काठमाडौँ, ०९ भदौ । नेपाली कांग्रेसका महामन्त्री विश्वप्रकाश शर्माले, दुई ठूला छिमेकीको आर्थिक प्रगतिबाट लाभ उठाउने गरी नीतिगत तयारी गर्नुपर्ने आवश्यकता औँल्याएका छन् ।

कांग्रेस पार्टी कार्यालय सानेपामा आयोजित पोलिसी ह्याकथन समापन कार्यक्रमलाई सम्बोधन गर्दैै महामन्त्री शर्माले विश्व अर्थतन्त्रका दुई ठूला छिमेकीको रुपमा रहेको नेपालमा विकासको नीति बनाउँदा युवालाई समेट्नुपर्ने भन्दै समुद्र नहुनुको पीडाबाट मुक्त हुनुपर्ने धारणा राखे । उनले भने, ‘हाम्रो उत्तरमा र दक्षिणमा भएको विशाल विशाल अर्थतन्त्रबाट लाभान्वित हुनुपर्छ । यो बेलामा हामी युवाहरुको बीचमा उभिएर भन्न चाहन्छौँ, समुद्र नहुनुको पीडाबाट नेपाल मुक्त हुनुपर्छ ।’

उनले सन् २०५० सम्ममा उत्तरी छिमेकी चीनको अर्थतन्त्र ५८ ट्रिलियन र दक्षिणी छिमेकी भारत ४६ ट्रिलियन अमेरीकी डलरको अर्थतन्त्र हुने भन्दै उनले यी दुई विशाल अर्थतन्त्रबाट लाभान्वित हुन युवालक्षित विषय र नीतिलाई राजनीतिक दलले समेट्नुपर्ने बताए ।

उनले भने, ‘हामी प्रकृतिको समुन्द्रको बीचमा भएर होला तर, दुईवटा प्रगतिको समुद्रको बीचमा जाँदै छौँ । त्यो बेलामा नेपाली कांग्रेस पार्टी होस् वा अन्य कुनै राजनीतिक दलले आफ्नो काम गर्ने शैलीमा युवाले सोचिरहेको विषय र नीतिहरुलाई देशको गम्भीर केन्द्रमा राख्नुपर्छ ।’

नेपाली कांग्रेसले देशभरिका युवाका विचार, विषय र नीतिलाई महत्व दिँदै पार्टीमा तिनका एजेण्डालाई स्थान दिने हेतुले पोलिसी ह्याकथन कार्यक्रमको आयोजना गरेको छ ।

अनलाइन आवेदनमार्फत नीतिपत्र पठाउने २२७ टोलीमध्येबाट छानिएका १० उत्कृष्ट टोलीको नीतिपत्र शनिवार प्रस्तुत गरिँदै छ ।

नितिपत्र प्रस्तुत भइसकेपछि शनिवार उत्कृष्ट हुनेलाई कांग्रेस सभापति शेरबहादुर देउवाले कदरपत्र सहित सम्मान गर्नेछन् ।