जनकपुरधाम, २४ असोज । धनुषा प्रहरीले जनकपुरधाम उपमहानगरपालिका–२३ स्थित बसपार्कबाट भन्सार छली गरी ल्याइएका करिब ८ लाख ८५ हजार रुपैयाँ मूल्यका इलेक्ट्रोनिक्स तथा अन्य सामान बरामद गरेको छ ।

जिल्ला प्रहरी कार्यालय धनुषाका अनुसार शनिबार दिउँसो करिब २ बजे महोत्तरीबाट जनकपुरधामतर्फ आउँदै गरेको मधेश प्रदेश ०३–००२ प १२२२ नम्बरको यात्रुवाहक ई–रिक्सालाई रोकेर जाँच गर्दा भन्सार छलीका सामान फेला परेका हुन् ।

प्रहरी टोलीले ई–रिक्साको चालक र यात्रु बस्ने सिटमुनि फल्स बटन बनाई लुकाएर ल्याइँदै गरेका सामान बरामद गरेको हो । सामानसहित ई–रिक्सा र त्यसका चालकलाई प्रहरीले नियन्त्रणमा लिएको छ ।

नियन्त्रणमा लिइएका चालक महोत्तरीको जलेश्वर नगरपालिका–२ निवासी १८ वर्षीय रवि कुमार ठाकुर रहेको जिल्ला प्रहरी कार्यालय धनुषाका प्रवक्ता तथा सूचना अधिकारी प्रहरी नायब उपरीक्षक ओमप्रकाश खनालले जानकारी दिए ।

प्रहरीका अनुसार बरामद सामानमा ई–रिक्सा, २०० थान इयरबड्स प्रो, १०० थान स्मार्टवाच, १०० थान नेकब्यान्ड, २० प्याकेट खुला इयरफोनलगायत सामग्री रहेका छन् ।

बरामद सामानमध्ये ई–रिक्साको मूल्य करिब ४ लाख रुपैयाँ, इयरबड्स प्रोको २ लाख रुपैयाँ, स्मार्टवाचको ८० हजार रुपैयाँ, नेकब्यान्डको ५५ हजार रुपैयाँ र खुला इयरफोनको १ लाख ५० हजार रुपैयाँ मूल्याङ्कन गरिएको प्रहरीले जनाएको छ ।

प्रहरीका अनुसार बरामद सामान र ई–रिक्सासहितको कुल अनुमानित मूल्य ८ लाख ८५ हजार रुपैयाँ रहेको छ ।

नियन्त्रणमा लिइएका चालक तथा बरामद सामानलाई आवश्यक कारबाहीका लागि जनकपुर भन्सार कार्यालयमा बुझाउने प्रक्रिया भइरहेको जिल्ला प्रहरी कार्यालय धनुषाले जनाएको छ ।