जनकपुरधाम, ०१ असोज । जनकपुरधामस्थित ऐतिहासिक तथा धार्मिक महत्व बोकेको जानकी मन्दिर वरपरको क्षेत्रलाई सरकारले संरक्षित स्मारक क्षेत्र घोषणा गरेको छ ।

संस्कृति, पर्यटन तथा नागरिक उड्डयन मन्त्रालयले नेपाल राजपत्रमा सूचना प्रकाशित गर्दै प्राचीन स्मारक संरक्षण ऐन, २०१३ को दफा ३ को उपदफा ४ ले दिएको अधिकार प्रयोग गरी जानकी मन्दिर संरक्षित स्मारक क्षेत्र घोषणा गरेको जनाएको छ ।

राजपत्रमा प्रकाशित सूचनाअनुसार संरक्षित क्षेत्रको पूर्वी सीमा जनकपुरधामको भानु चोक, कदम चोक, जिल्ला प्रशासन कार्यालय र मालपोत कार्यालय हुँदै दक्षिणतर्फ जाने परिक्रमा पथसम्म तोकिएको छ ।

त्यस्तै, पश्चिमतर्फ भमरपुरा चोक हुँदै पश्चिमतर्फ जाने श्री याज्ञवल्क्य संस्कृत माध्यमिक विद्यालय ज्ञानकूप, हनुमान मन्दिर हुँदै उत्तरतर्फ जाने परिक्रमा पथसम्मको क्षेत्रलाई सीमा तोकिएको छ ।

उत्तरतर्फ हनुमान मन्दिर, पिडारी चोकस्थित राजा जनक स्मारक हुँदै मधेश प्रदेश भवन, मिल्स एरिया र भानु चोकसम्मको परिक्रमा पथको सडक सीमा निर्धारण गरिएको छ ।

यसैगरी, दक्षिणतर्फ जनकपुरधामको मुरली चोकस्थित विद्यापति स्मारकदेखि भमरापुरा चोकसम्म जाने परिक्रमा पथको सडकलाई सीमा मानिएको छ ।

सरकारले तोकेको चार किल्लाभित्र पर्ने क्षेत्र अब प्राचीन स्मारक संरक्षणसम्बन्धी कानुनी व्यवस्थाअनुसार संरक्षण र व्यवस्थापनको दायरामा आउनेछ ।

ऐतिहासिक, धार्मिक तथा सांस्कृतिक दृष्टिले महत्वपूर्ण जानकी मन्दिर क्षेत्रलाई संरक्षित स्मारक क्षेत्र घोषणा गरिनुलाई जनकपुरधामको ऐतिहासिक सम्पदा संरक्षणतर्फको महत्वपूर्ण सरकारी कदमका रूपमा हेरिएको छ ।

संस्कृति, पर्यटन तथा नागरिक उड्डयन मन्त्रालयको उक्त सूचना असोज १ गतेको नेपाल राजपत्रको भाग ५, खण्ड ७६, संख्या ३४ मा प्रकाशित भएको हो ।