जनकपुरधाम, २२ असार । नागरिक बचाउ महाअभियानका संयोजक दुर्गा प्रसाईंले वर्तमान सरकारको कार्यशैलीप्रति असन्तुष्टि व्यक्त गर्दै सिंहदरबारको प्रशासनिक तथा राजनीतिक प्रणाली सत्तामा रहेका नेतृत्वकै कारण कमजोर बनेको आरोप लगाएका छन् ।

पूर्वसांसद धवल शमशेर राणासँग जनकपुरधाम पुगेका प्रसाईंले सञ्चारकर्मीसँग कुराकानी गर्दै विगतमा राज्यका संरचनामाथि आक्रमण गर्ने प्रवृत्तिका व्यक्तिहरू नै अहिले सरकारको नेतृत्वमा पुगेकाले सिंहदरबारको प्रणाली नै प्रभावित भएको दाबी गरे ।

उनले वर्तमान शासनशैलीले मुलुकको प्रशासनिक संयन्त्र र सुशासनमा नकारात्मक असर परेको टिप्पणी गरे ।

सरकारले सय दिनको कार्यकाल पूरा गरिसकेको उल्लेख गर्दै प्रसाईंले आफ्नो अभियानले सरकारको कार्यसम्पादनबारे विस्तृत समीक्षा गर्ने तयारी गरिरहेको बताए ।

समीक्षा प्रतिवेदन भिडियोमार्फत सार्वजनिक गरिने जानकारी दिँदै उनले सरकारले गरेका काम र कमजोरीबारे जनतालाई जानकारी गराइने बताए ।

प्रसाईंले नेपालको विदेश नीतिसम्बन्धी विषयमा समेत प्रश्न उठाए । उनले पछिल्ला गतिविधिले नेपालको अन्तर्राष्ट्रिय सम्बन्धमा असर पर्न सक्ने दाबी गर्दै राष्ट्रिय हितलाई केन्द्रमा राखेर कूटनीतिक नीति सञ्चालन गर्नुपर्ने धारणा व्यक्त गरे ।

नेपालमा दलाई लामाको जन्मोत्सव मनाउन थालिएको विषय उल्लेख गर्दै उनले यसले अन्तर्राष्ट्रिय स्तरमा फरक सन्देश गएको आरोप लगाए ।

नागरिक बचाउ महाअभियानअन्तर्गत प्रसाईं मंगलबार जनकपुरधाममा कार्यकर्तासँग भेटघाट गर्ने कार्यक्रम रहेको छ ।

यसका साथै उनले जानकी मन्दिरमा पूजा अर्चना गर्ने, नगर क्षेत्रमा जुलुस प्रदर्शन गर्ने तथा साँझ जानकी मन्दिर परिसरमा दीप प्रज्वलन कार्यक्रममा सहभागी हुने कार्यक्रम तय गरिएको जनाइएको छ ।

प्रसाईंले सरकारप्रति विभिन्न राजनीतिक, प्रशासनिक तथा कूटनीतिक विषयमा गम्भीर प्रश्न उठाएका भए पनि ती आरोपबारे सरकारको आधिकारिक प्रतिक्रिया भने सार्वजनिक भएको छैन ।