महोत्तरी, १९ असार । सशस्त्र प्रहरीका सहायक निरीक्षक (असई) थमन विक हत्या प्रकरणमा पक्राउ परेका पूर्वप्रतिनिधिसभा सदस्य लक्ष्मी महतो कोइरीलाई कैद भुक्तानका लागि जलेश्वर कारागार पठाइएको छ ।

उच्च अदालत जनकपुरले पाँच वर्ष कैद सजाय सुनाएपछि पक्राउ परेका कोइरीलाई जिल्ला प्रहरी कार्यालय महोत्तरीले जिल्ला अदालत जलेश्वरमा उपस्थित गराएको थियो ।

अदालतको आदेशअनुसार उनलाई कैद भुक्तानका लागि जलेश्वर कारागार चलान गरिएको महोत्तरी प्रहरीका प्रवक्ता तथा डीएसपी पञ्चलाल गोलेले जानकारी दिए ।

२०७२ भदौ २५ गते मधेस आन्दोलनका क्रममा महोत्तरीको लोहारपट्टीमा ड्युटीमा रहेका सशस्त्र प्रहरीका असई थमन विकको हत्या भएको थियो ।

सोही घटनासम्बन्धी कर्तव्य ज्यान मुद्दामा उच्च अदालत जनकपुरले २०८३ असार १७ गते कोइरीलाई पाँच वर्ष कैद सजाय सुनाएको थियो ।

फैसलापछि फरार रहेका कोइरीलाई प्रहरीले असार १८ गते साँझ गौशाला नगरपालिका–५ स्थित एमाले पार्टी कार्यालय अगाडिबाट पक्राउ गरेको थियो । उनी गौशाला नगरपालिका–२ निगौल निवासी हुन् ।

यसअघि महोत्तरी जिल्ला अदालतले २०८० मंसिर २८ गते उक्त मुद्दामा कोइरीलाई सफाइ दिएको थियो । तर, उच्च अदालत जनकपुरले जिल्ला अदालतको फैसला उल्टाउँदै उनलाई दोषी ठहर गरी पाँच वर्ष कैद सजाय सुनाएको हो ।

उक्त फैसला कार्यान्वयनका लागि पक्राउ गरिएका कोइरीलाई अदालतको आदेशपछि जलेश्वर कारागार पठाइएको प्रहरीले जनाएको छ ।