जनकपुरधाम, ३० जेठ । धार्मिक, सांस्कृतिक तथा ऐतिहासिक महत्व बोकेको प्राचीन श्री सीताराम विवाह मणिमण्डप परिसरमा शनिबार सप्ताहिक सरसफाइ कार्यक्रम सम्पन्न गरिएको छ ।

स्थानीय युवाहरूको सहभागितामा सञ्चालन गरिएको अभियानले मन्दिर तथा सार्वजनिक स्थलको स्वच्छता कायम राख्न महत्वपूर्ण योगदान पुर्याएको भन्दै स्थानीयवासीले सराहना गरेका छन् ।

हरेक शनिबार सञ्चालन हुँदै आएको सरसफाइ अभियानअन्तर्गत यसपटक पनि युवाहरू बिहानैदेखि विवाह मण्डप परिसरमा जुटेर मन्दिर क्षेत्र, आँगन, पैदलमार्ग तथा वरपरका सार्वजनिक स्थानहरू सफा गरेका थिए । अभियानमा सहभागी युवाहरूले प्लास्टिकजन्य फोहोर, झारपात तथा अन्य फोहोर व्यवस्थापन गर्दै परिसरलाई स्वच्छ र आकर्षक बनाएका थिए ।

स्थानीय समाजसेवी युवा कैलाश कुमार राउतले धार्मिक तथा सांस्कृतिक सम्पदाको संरक्षणका लागि सरसफाइ अभियानलाई निरन्तरता दिन आवश्यक रहेको बताए । उनले मणिमण्डप जनकपुरधामको धार्मिक पहिचानसँग जोडिएको महत्वपूर्ण स्थल भएकाले यसको स्वच्छता र संरक्षण सबैको साझा दायित्व भएको उल्लेख गरे ।

राउतले भने, ‘विवाह मण्डप एक धार्मिक स्थल मात्र नभई हाम्रो सांस्कृतिक गौरव र पहिचान पनि हो । यहाँ दैनिक रूपमा श्रद्धालु तथा पर्यटकहरूको आगमन हुने भएकाले परिसर सधैं सफा र व्यवस्थित हुन आवश्यक छ । युवाहरूले स्वस्फूर्त रूपमा सञ्चालन गरिरहेको यो अभियान निकै सकारात्मक र प्रेरणादायी छ ।’

उनले सरसफाइलाई एकदिने कार्यक्रमका रूपमा मात्र नभई सामाजिक संस्कारका रूपमा विकास गर्नुपर्नेमा जोड दिए । स्थानीय तह, विभिन्न संघसंस्था तथा सर्वसाधारणले पनि यस्ता अभियानमा हातेमालो गर्न सके जनकपुरधामलाई स्वच्छ, सुन्दर र व्यवस्थित धार्मिक नगरीका रूपमा स्थापित गर्न सहज हुने उनको भनाइ थियो ।

सरसफाइ अभियानमा संलग्न युवाहरूले सार्वजनिक स्थलको संरक्षणका लागि समुदायको सहभागिता अपरिहार्य रहेको बताए । उनीहरूले धार्मिक तथा पर्यटकीय क्षेत्रहरूमा फोहोर व्यवस्थापनबारे जनचेतना अभिवृद्धि गर्न नियमित रूपमा यस्ता कार्यक्रम सञ्चालन गर्दै आएको जानकारी दिए ।

स्थानीय बासिन्दाहरूले पनि युवाहरूको प्रयासको खुलेर प्रशंसा गरेका छन् । उनीहरूका अनुसार सरकारी निकायको मात्र भर नपरी युवाहरूले आफ्नै पहलमा सार्वजनिक स्थलको सरसफाइ गर्दै आएको कार्य अनुकरणीय छ । यसले समाजमा सकारात्मक सन्देश प्रवाह गर्नुका साथै अन्य युवालाई पनि सामाजिक कार्यमा प्रेरित गरिरहेको उनीहरूको भनाइ छ ।

जनकपुरधाम धार्मिक तथा सांस्कृतिक दृष्टिले देशकै प्रमुख तीर्थस्थलमध्ये एक मानिन्छ । विशेषगरी श्री सीताराम विवाह मणिमण्डप हिन्दू धर्मावलम्बीहरूको आस्थाको केन्द्रका रूपमा परिचित छ । यहाँ वर्षभरि स्वदेशी तथा विदेशी श्रद्धालुहरूको आवागमन भइरहने भएकाले परिसरको स्वच्छता र सौन्दर्य कायम राख्नु आवश्यक मानिन्छ ।

युवाहरूको यस सक्रियताले जनकपुरधामलाई सफा, हराभरा र व्यवस्थित शहर बनाउने अभियानमा नयाँ ऊर्जा थपेको स्थानीयवासीको विश्वास छ ।