महोत्तरी, २३ जेठ । उपचारका लागि अस्पतालसम्म पुग्न आर्थिक तथा भौगोलिक कठिनाइ भोगिरहेका महोत्तरीका सीमावर्ती क्षेत्रका सयौं नागरिकले शनिबार आफ्नै गाउँमा विशेषज्ञ चिकित्सकबाट स्वास्थ्य सेवा पाएका छन् ।

सशस्त्र प्रहरी परिवार महिला सङ्घले महोत्तरीको सम्सीस्थित जनता माध्यमिक विद्यालयमा आयोजना गरेको निःशुल्क स्वास्थ्य शिविरमा ठूलो सङ्ख्यामा स्थानीयवासी सहभागी भएका हुन् ।

सशस्त्र प्रहरी परिवार महिला सङ्घको २५औँ वार्षिकोत्सवको अवसरमा ‘सीमावासीसँग सशस्त्र प्रहरी’ कार्यक्रमअन्तर्गत सञ्चालन गरिएको शिविरले विशेषगरी स्वास्थ्य सेवाको पहुँचबाट टाढा रहेका विपन्न, ज्येष्ठ नागरिक, महिला तथा बालबालिकालाई राहत दिएको छ ।

सामान्य अवस्थामा उपचारका लागि सदरमुकाम वा अन्य शहर धाउनुपर्ने बाध्यता रहेका स्थानीयले गाउँमै विशेषज्ञ चिकित्सकको सेवा पाएपछि खुसी व्यक्त गरेका छन् ।

शिविरमा सशस्त्र प्रहरीका चिकित्सकसहित विभिन्न विधाका विशेषज्ञ चिकित्सकहरूले स्वास्थ्य परीक्षण, परामर्श तथा आवश्यक औषधि निःशुल्क उपलब्ध गराएका थिए ।

हाडजोर्नी, नाक–कान–घाँटी, बालरोग, स्त्रीरोग, दन्तरोग, चर्मरोग तथा जनरल मेडिसिनसम्बन्धी सेवा प्रदान गरिएको थियो । उपचारसँगै रोग पहिचान, स्वास्थ्य सचेतना तथा आवश्यक परामर्शसमेत दिइएको आयोजकले जनाएको छ ।

सीमावर्ती क्षेत्रमा बसोबास गर्ने धेरै नागरिक आर्थिक अभाव तथा स्वास्थ्य संस्थाको दूरीका कारण नियमित उपचारबाट वञ्चित हुँदै आएका छन् । यस्ता समुदायलाई लक्षित गरी आयोजना गरिएको शिविरले तत्काल उपचार मात्र नभई स्वास्थ्यसम्बन्धी समस्याको पहिचान र समाधानमा समेत सहयोग पुर्याएको स्थानीयको भनाइ छ ।

सामान्यतया सीमा सुरक्षा र अपराध नियन्त्रणमा केन्द्रित रहने सशस्त्र प्रहरी यसपटक स्वास्थ्य सेवा लिएर गाउँमै पुगेपछि स्थानीयवासीमा उत्साह थपिएको देखिएको थियो । सुरक्षा निकायले सामाजिक उत्तरदायित्व अन्तर्गत नागरिकको आधारभूत आवश्यकतासँग जोडिएका क्षेत्रमा पनि सक्रियता देखाएको भन्दै स्थानीयले प्रशंसा गरेका छन् ।

शिविरको अवलोकन गर्दै महोत्तरीका प्रमुख जिल्ला अधिकारी इन्द्रदेव यादवले सीमावर्ती क्षेत्रका नागरिकलाई लक्षित गरी सञ्चालन गरिएको स्वास्थ्य शिविर प्रभावकारी र अनुकरणीय पहल भएको बताए ।

उनले राज्यका निकायहरूले नागरिकको घरदैलोमै पुगेर सेवा प्रवाह गर्ने संस्कृतिको विकास आवश्यक रहेको उल्लेख गर्दै यस्ता कार्यक्रमले सरकार र नागरिकबीचको सम्बन्ध थप सुदृढ बनाउने विश्वास व्यक्त गरे ।

सशस्त्र प्रहरी उपरीक्षक शेरबहादुर अधिकारीले सीमावर्ती क्षेत्रका नागरिकलाई सहज रूपमा स्वास्थ्य सेवा उपलब्ध गराउने उद्देश्यले शिविर सञ्चालन गरिएको जानकारी दिए । उनका अनुसार अपेक्षाभन्दा बढी नागरिकले सेवा लिएका छन् र शिविरप्रति स्थानीयको सकारात्मक प्रतिक्रिया प्राप्त भएको छ ।

स्वास्थ्य शिविरमा सहभागी स्थानीयवासीहरूले उपचारका साथै आवश्यक औषधि निःशुल्क पाउँदा आर्थिक भार कम भएको बताए । कतिपय वृद्धवृद्धा र महिलाले लामो समयदेखि देखिएका स्वास्थ्य समस्याको परीक्षण गराउने अवसर पाएको उल्लेख गरेका छन् ।

स्थानीय समुदायले यस्ता कार्यक्रम एकपटकको औपचारिकतामा सीमित नराखी नियमित रूपमा सञ्चालन गर्न आग्रह गरेका छन् । उनीहरूका अनुसार सीमावर्ती क्षेत्रमा स्वास्थ्य सेवा, शिक्षा तथा अन्य आधारभूत सेवाको पहुँच अझै पनि चुनौतीपूर्ण रहेकाले यस्ता शिविरले प्रत्यक्ष राहत प्रदान गर्ने गरेको छ ।