जनकपुरधाम, ०६ जेठ । जनकपुरधाममा जारी शहीद कप महिला टी–२० क्रिकेट लिग प्रतियोगितामा पर्सा र सिरहा विजयी भएका छन् ।

मधेश प्रदेशको खेलकुद तथा समाज कल्याण मन्त्रालयको आयोजनामा निर्माणाधीन रामजानकी बहुउद्देश्यीय रंगशालामा बुधबार सम्पन्न खेलमा पर्साले महोत्तरीलाई एकतर्फी रूपमा पराजित गर्दा सिरहाले रौतहटमाथि प्रभावशाली जीत दर्ता गरेको हो ।

पहिलो खेलमा पर्सा जिल्ला महिला क्रिकेट टोलीले महोत्तरीलाई १० विकेटले हराउँदै शानदार प्रदर्शन गर्‍यो ।

टस जितेर पहिले ब्याटिङ गरेको महोत्तरीले निर्धारित २० ओभरमा ८ विकेट गुमाउँदै १३३ रन बनाएको थियो ।

महोत्तरीका लागि आरती महतोले अर्धशतक प्रहार गर्दै ५२ रन बनाइन् भने सीमा कनवारले १५ र विमला वलमपाकीले १४ रनको योगदान दिइन् ।

पर्साका बलर सीवानी साहले उत्कृष्ट बलिङ गर्दै ३ विकेट हात पारिन् ।

१३४ रनको लक्ष्य पछ्याएको पर्साले आक्रामक ब्याटिङ गर्दै मात्र १० ओभरमै बिना विकेटको क्षतिमा १३५ रन जोड्दै खेल आफ्नो पक्षमा पार्‍यो ।

पर्साको जितमा सीवानी साहले विस्फोटक ब्याटिङ गर्दै १० चौकाको सहयोगमा ७३ रन बनाइन् भने साना प्रवीणले ४४ रनको महत्वपूर्ण योगदान दिइन् ।

त्यसैगरी, दोस्रो खेलमा सिरहा जिल्ला महिला क्रिकेट टोलीले रौतहटलाई ४१ रनले पराजित गर्‍यो ।

सिरहाले निर्धारित २० ओभरमा ५ विकेट गुमाएर १२७ रन बनाएको थियो ।

टोलीका लागि श्वेता लामाले सर्वाधिक ३१ रन बनाइन् भने अनुराधा चौधरीले २४, मिना महतोले २० र आरती चौधरीले १२ रन थपिन् ।

रौतहटका बलर प्रतीक्षा सिंहले २ तथा मनिका साहले १ विकेट लिइन् ।

१२८ रनको लक्ष्य पछ्याएको रौतहटको टोली सिरहाको कसिलो बलिङसामु टिक्न सकेन । रौतहट ८६ रनमै समेटिएपछि सिरहाले सहज जित निकाल्न सफल भयो ।