जनकपुरधाम, २१ फागुन । नेपाल पत्रकार महासंघ धनुषाका सदस्य एवम् सञ्चारकर्मी घनश्याम मिश्रले महासंघको सदस्यता र नेपाल प्रेस युनियनको उपाध्यक्ष पदबाट राजीनामा दिएका छन् ।

मिश्रले मधेश प्रदेशका भौतिक पूर्वाधार विकासमन्त्री सरोजकुमार यादवको विवादास्पद अभिव्यक्तिप्रति कडा आपत्ति जनाउँदै यो निर्णय गरेका हुन् ।

मन्त्री यादवले पत्रकारहरुलाई लक्षित गर्दै दिएको अभिव्यक्तिलाई मिश्रले अस्वीकार गरेपछि महासंघको सदस्यता र प्रेस युनियनको उपाध्यक्ष पदबाट राजीनामा दिएका हुन् ।

मिश्रले आफ्ना फेसबुक स्टेटसमा यो जानकारी दिँदै लेखेका छन् कि मन्त्री यादवको अभिव्यक्तिले पत्रकारहरुको छवि मेटाएको छ र यसो गर्दा महासंघका केही पदाधिकारीहरुले पनि चुप्पी साधेकोमा उनले गुनासो जनाएका छन् ।

मन्त्री यादवको अभिव्यक्तिमा पत्रकारहरुको बारेमा गम्भिर टिप्पणी गरिएको थियो । त्यसपछि नेपाल पत्रकार महासंघ धनुषा शाखाले कुनैपनि आधिकारिक प्रतिक्रिया जनाएन । यसले मिश्रलाई ठूलो निराशा ल्याएको थियो ।

उनले महासंघबाट राजीनामा दिनुको कारण यही भएको बताए । मिश्रले आफ्नो फेसबुक पोस्टमा नेपाल प्रेस युनियनको उपाध्यक्ष पद पनि त्यागेको घोषणा गर्दै भनेका छन् कि, ‘मैले यस्तो स्थिति हेर्न चाहँदैन जहाँ पत्रकारहरूको स्वाधीनता र प्रतिष्ठामा आँच पुगोस् ।’

धनुषा शाखाका अध्यक्ष पुरन गुप्ताले पत्रकार मिश्रको राजीनामा पछि अझैसम्म जवाफ नदिएकोमा आलोचना गरिएको छ ।मिश्रको अनुसार गुप्ता यदि गम्भिर थिए भने मन्त्रीको अभिव्यक्तिप्रति जवाफ दिनु पथ्र्यो । उनले गुप्ताको चुप्पीलाई नैतिकताको कमी मान्दै अब गुप्ताले पनि पदबाट राजीनामा दिनुपर्ने टिप्पणी गरेका छन् ।

मन्त्री यादवको उक्त अभिव्यक्तिले जनकपुरधामका पत्रकारहरुको प्रतिष्ठामा ठूलो धक्का पुर्याएको छ । मन्त्रीको अभिव्यक्ति र महासंघका पदाधिकारीहरुको चुप्पीले पत्रकार समुदायमा असन्तोष फैलाएको छ ।

यद्यपि, यस घटनाको बारेमा नेपाल पत्रकार महासंघ धनुषा शाखाले अबसम्म कुनै आधिकारिक प्रतिक्रिया दिएको छैन ।