काठमाडौं, १८ फागुन । नेपाल क्रिकेट संघ (क्यान) ले आगामी मार्च महिनामा युगाण्डामा हुने महिला टी–२० आई क्रिकेट शृंखलाका लागि अन्तिम टोली घोषणा गरेको छ ।

यो शृंखला आगामी मार्चको दोस्रो सातादेखि युगाण्डा क्रिकेट एसोसियसनको आयोजनामा सुरु हुनेछ । नेपालका लागि यो शृंखलामा साना प्रवीण र रिया शर्मा पहिलोपटक खेल्न जाँदैछन् ।

यी दुबै खेलाडीहरूले युगाण्डामा हुने महिला टी–२०आई शृंखलामा आफ्नो पहिलो उपस्थिति जनाएका छन् । यी दुबैले यू–१९ क्रिकेट विश्व कपमा नेपालको प्रतिनिधित्व गरिसकेका छन् । युगाण्डामा मार्च ८ देखि १६ सम्म हुने यस शृंखलामा चार देशको महिला टोली सहभागी हुनेछन् ।

यी चार देशहरू युगाण्डा, नेपाल, हङकङ र नामिबिया हुन् । शृंखला डबल राउण्ड रोबिन फारम्याटमा हुनेछ र त्यसपछि फाइनल हुनेछ । यस शृंखलामा प्रत्येक टोलीले एक अर्कासँग दुई पटक खेल्नेछ ।

नेपालले गत महिना घरेलु मैदानमा थाइल्याण्ड र नेदरल्याण्ड्ससँग ३–३ खेलको शृंखला खेलिसकेको थियो । त्यतिबेला नेपाली महिला टोलीले जित निकाल्न सकेन । त्यसका बाबजुद नेपाली महिला क्रिकेट टोलीलाई अब अर्को अन्तर्राष्ट्रिय शृंखलामा प्रतिस्पर्धा गर्नको अवसर मिलेको छ ।

नेपालले युगाण्डासँग यसअघि पनि घरेलु मैदानमा शृंखला खेलिसकेको छ भने हङकङसँग पनि यसअघि खेलेर अनुभव प्राप्त गरिसकेको छ । यद्यपि, नामिबियासँग नेपालको यो पहिलो भेट हुनेछ ।