जनकपुरधाम, २० भदौ । संयुक्त मधेश संघर्ष समितिले यही भदौ ३१ गते जनकपुरधाममा खबरदारी सभा आयोजित गर्ने निर्णय गरेको छ ।

भदौ १८ गते जनकपुरधाममा सम्पन्न संयुक्त संघर्ष समितिको बैठकले सो निर्णय गरेको हो ।

तराई–मधेश लोकतान्त्रिक पार्टीका प्रचार विभाग प्रमुख उमेश कुमार मण्डलका अनुसार “२०८१ भदौ ३१ गते संयुक्त मधेश संघर्ष समितिले जनकपुरधामको कलवार कुटीमा दिउँसो १ बजे ‘मधेश र संविधान संशोधनः हाम्रो खबरदारी’ माथि केन्द्रित रहेर खबरदारी सभा गर्नेछ ।“

संयुक्त मधेश संघर्ष समितिले गत साउन ४ गते प्रकाशित प्रेस विज्ञप्ति मार्फत प्रदेशहरुलाई निर्वाचन क्षेत्र मानी पूर्ण समानुपातिक निर्वाचन पद्धति, प्रदेशहरुको सीमाङ्कनमा पहिचानमा आधारित सुधार, अनुचित थ्रेसहोल्डको समाप्ति, प्रदेश र स्थानिय तहको प्रतिनिधि सदन राष्ट्रिय सभाको भूमिकामा अझ मजबूती, संघीय संरचनामा प्रदेशिक स्वशासनको सुदृढताको निमित्त प्रादेशिक राजनीतिक दलहरुको मान्यता, भ्रष्टाचारमाथि कारगर नियन्त्रण र सुशासनको सुनिश्चितता जस्ता मागहरु अघि सारेको छ । समितिले सबै पहिचानवादी संघीयतावादीहरुलाई गोलबन्द हुन आह्वान समेत गरेको छ ।

बैठकमा तराई–मधेश लोकतान्त्रिक पार्टीका अध्यक्ष वृषेश चन्द्र लाल, वरिष्ठ नेता डा. विजय कुमार सिंह, मधेश राष्ट्रिय मुक्ति मोर्चाका संयोजक जगत प्रसाद यादव, एकीकृत समाजवादी पार्टीका नेता शीतल झा, नेपाल सद्भावना पार्टीका महामन्त्री पवन कुमार साह, जनअधिकार पार्टीका अध्यक्ष इमदाद गड्डीलगायत जोगेन्द्र राय, सतीश लाल दास, सुभाष कर्ण, बिभा ठाकुर, बिन्दु ठाकुर, बिमला साह, भोलानाथ झा, मुरारी कर्ण, इश्वर पण्डित, आदि नेताहरुको उपस्थिति थियो ।