जनकपुरधाम, २२ जेठ । नागरिकता विधेयक प्रमाणीकरणबारे सर्वोच्च अदालतबाट जारी अल्पकालिन अन्तरिम आदेशले मधेशी जनतामाथि पुनः अर्को गम्भीर प्रहार गरेको भन्दै धनुषामा विरोध प्रदर्शन गरिएको छ ।

सर्वोच्चको आदेशको विरोधमा धनुषाको महेन्द्रनगरका स्थानीयबासीले सोमबार राजमार्ग अवरुद्ध गरेका हुन् ।

सर्वोच्च अदालतले नागरिकता वितरण रोक्न आदेश दिएर लाखौँ मधेशीको भविष्यसँग खेलवाड गरेको भन्दै महेन्द्रनगरका युवा नेता सितेश झाको नेतृत्वमा टायर बालेर सडक अवरुद्ध गरि विरोध प्रर्दशन गरिएको छ ।

युवाहरु ढल्केवर–जनकपुरधाम सडक खण्ड अन्तर्गत महेन्द्रनगरमा टायर बालेर बाटो अवरुद्ध गर्दै प्रदर्शनमा उत्रेका छन् ।

प्रदर्शनमा सहभागीहरूले मधेशीलाई अनागरिक बनाउन मिल्दैन, नागरिकतामा राजनीति बन्द गर, राष्ट्रपतिले प्रमाणीकरण गरेको विधेयकको आधारमा नागरिकता वितरण गरजस्ता नारा लगाएका थिए ।

राष्ट्रपति रामचन्द्र पौडेलले जेठ १७ गते नागरिकता विधेयक प्रमाणीकरण गरेका थिए । आइतबारबाट जिल्ला प्रशासन कार्यालयहरूले प्रमाणीकरण भएको विधेयकको आधारमा नागरिकता वितरण गर्ने सूचना समेत जारी गरेको थियो ।

तर, आइतबार नै सर्वोच्च अदालतले राष्ट्रपतिद्वारा प्रमाणीकरण गरिएको विधेयकलाई तत्काल कार्यान्वयन नगर्न आदेश दियो । उक्त आदेशपछि नागरिकता वितरण रोकिएको छ ।