जनकपुरधाम, ०६ मंसिर । मधेश प्रदेशका नवनियुक्त मुख्यमन्त्री सरोजकुमार यादवले पद तथा गोपनीयताको शपथ ग्रहण गरेका छन् ।

प्रदेश प्रमुख डा. सुरेन्द्रलाभ कर्णले आइतबार जनकपुरधामस्थित प्रदेश प्रमुखको कार्यालयमा मुख्यमन्त्री यादवलाई पद तथा गोपनीयताको शपथ गराएका हुन् ।

नेपालको संविधानको धारा १६८ को उपधारा (३) बमोजिम प्रदेशसभाको सबैभन्दा ठूलो दलको संसदीय दलको नेताको हैसियतमा जनता समाजवादी पार्टी (जसपा) नेपालका नेता यादव शनिबार मुख्यमन्त्री नियुक्त भएका थिए ।

प्रदेशमा नयाँ सरकार गठनका लागि दलहरूबीच सहमति जुट्न नसकेपछि संविधानको धारा १६८ (३) अनुसार प्रदेशसभाको सबैभन्दा ठूलो दलको नेताका रूपमा यादव मुख्यमन्त्री नियुक्त भएका हुन् ।

संवैधानिक व्यवस्थाअनुसार मुख्यमन्त्री यादवले नियुक्त भएको मितिले ३० दिनभित्र प्रदेशसभाबाट विश्वासको मत लिनुपर्नेछ ।

विश्वासको मत प्राप्त गर्न नसकेमा प्रदेशमा पुनः सरकार गठनको संवैधानिक प्रक्रिया अघि बढ्नेछ ।