जनकपुरधाम, १७ भदौ । रसुवामा भदौ १० गते आएको विनाशकारी बाढी तथा त्यसबाट प्रभावित विभिन्न जिल्लामा मानवीय क्षतिको संख्या बढ्दै गएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार बुधबार साँझ ६ बजेसम्म बाढीबाट १ हजार २०४ जनाको मृत्यु भएको छ ।

प्राधिकरणका अनुसार सबैभन्दा धेरै मृत्यु चितवनमा ३४८, नवलपरासी पूर्वमा २१७, नवलपरासी पश्चिममा २०२, नुवाकोटमा १५५, गोरखामा ६९, धादिङमा ६०, तनहुँमा ३८ र रसुवामा ११५ जनाको भएको छ । विभिन्न स्थानबाट मानव अंगसमेत फेला परेको प्राधिकरणले जनाएको छ ।

हालसम्म ९५ वटा शवको सनाखत गरी आफन्तलाई बुझाइएको छ । बाढी तथा पहिरोमा परी ३०१ जना घाइते भएका छन् भने करिब ४ हजार २१६ जना अझै सम्पर्कविहीन रहेको विवरण सार्वजनिक गरिएको छ ।

सम्पर्कविहीन हुनेमा नेपाली सेनाका ४५, नेपाल प्रहरीका २५, सशस्त्र प्रहरी बलका १३, भन्सार कार्यालयका १४ तथा अध्यागमन कार्यालयका ३ जना रहेका छन् ।

बाढी प्रभावित क्षेत्रमा उद्धार तथा राहतका लागि सुरक्षा निकायबाट ठूलो संख्यामा जनशक्ति परिचालन गरिएको छ ।

प्राधिकरणका अनुसार हालसम्म २१ हजार ३१४ सुरक्षाकर्मी परिचालन भएका छन् । त्यसमध्ये नेपाल प्रहरीका ७ हजार ९१२, नेपाली सेनाका ९ हजार १९९ र सशस्त्र प्रहरी बलका ४ हजार २०३ जना छन् ।

बाढी प्रभावित क्षेत्रबाट हालसम्म ११ हजार ९९३ जनाको उद्धार गरिएको छ ।

नेपाली सेनाले मात्रै हवाइ उद्धारमार्फत २७३ विदेशी नागरिक र ४ हजार ९१ नेपालीको उद्धार गरेको जनाएको छ ।

सेनाले हालसम्म ६९० पटक हवाइ उडान गरेकोमा बुधबार मात्रै ८० उडान गरेको छ ।

यस्तै, विभिन्न अस्पतालबाट १९५ जना घाइते डिस्चार्ज भइसकेका छन् । नेपाली सेनाबाट ३ हजार १११ र सशस्त्र प्रहरीबाट १ हजार ६२८ जनाले स्वास्थ्य उपचार सेवा पाएका छन् ।

उद्धार गरिएका तथा सुरक्षित स्थानमा राखिएका व्यक्तिमध्ये हाल ३ हजार ४५३ जना होल्डिङ सेन्टरमा रहेका छन् । तीमध्ये नुवाकोटमा २ हजार ४६६, धादिङमा २६० र रसुवामा ३९८ जना रहेको प्राधिकरणले जनाएको छ ।

बाढीका कारण प्रभावित क्षेत्रमा खाद्यान्न तथा गैरखाद्य सामग्री पुर्‍याउने काम पनि जारी छ । हालसम्म ४५ ट्रक र ३७ बोलेरोमार्फत राहत सामग्री पठाइएको छ भने हेलिकप्टरबाट समेत ९ उडान गरी सामग्री प्रभावित क्षेत्रमा पुर्‍याइएको छ ।

भदौ १६ गते थप १४ वटा गाडीमार्फत राहत सामग्री पठाइएको थियो ।

सशस्त्र प्रहरी बलले प्रभावित जिल्लाभित्र हवाइमार्फत राहत सामग्री ढुवानीका लागि हालसम्म १०७ उडान गरेको छ ।

बुधबार मात्रै नुवाकोटमा ५ उडानबाट ३ स्थान र रसुवामा २५ उडानबाट ९ स्थानमा राहत सामग्री पुर्‍याइएको प्राधिकरणले जनाएको छ ।

सरकारले प्रभावित क्षेत्रमा इन्धन आपूर्तिको अवस्थालाई पनि निरन्तर निगरानीमा राखेको छ । हाल प्रभावित क्षेत्रमा ३४ हजार लिटर डिजेल, १६ हजार लिटर पेट्रोल र ७ हजार लिटर हवाइ इन्धन मौज्दात रहेको जनाइएको छ ।

बाढीका कारण क्षतिग्रस्त सञ्चार संरचना पुनः सञ्चालनमा ल्याउने कामसमेत भइरहेको छ । नेपाल टेलिकमका ११० वटा टावरमा क्षति पुगे पनि अहिले सबै सञ्चालनमा आएका छन् ।

एनसेलका ७८ टावरमा क्षति पुगेकोमा ७५ वटा सञ्चालनमा आइसकेका छन् ।

सरकारले प्रभावित जिल्लाका लागि नगद राहतसमेत उपलब्ध गराएको छ । रसुवा र नुवाकोटलाई १–१ करोड रुपैयाँ तथा धादिङलाई ५० लाख रुपैयाँ उपलब्ध गराइएको छ ।

साथै, प्रभावित १५ स्थानीय तहका लागि ६ करोड ७५ लाख रुपैयाँ निकासा गरिएको र सोही बराबरको थप ६ करोड ७५ लाख रुपैयाँसमेत निकासा भएको प्राधिकरणले जनाएको छ ।

बाढीपछि सम्पर्कविहीन रहेका विदेशी नागरिक, विदेशमा रहेका नेपालीका आफन्तले खोजिरहेका व्यक्तिहरू, उपचाररत घाइते तथा हेलिकप्टरबाट उद्धार गरिएका व्यक्तिको विवरण प्राधिकरणको वेबसाइट तथा सामाजिक सञ्जालमार्फत सार्वजनिक गरिएको छ ।