जनकपुरधाम, १४ भदौ । रसुवाको भोटेकोशी नदीमा आएको विनाशकारी बाढीबाट मृत्यु भएका ७६८ जनाको शव फेला परेको छ ।
नेपाल प्रहरीले आइतबार दिउँसो २ बजेसम्म विभिन्न जिल्लाबाट ७६८ शव फेला परेको जनाएको हो ।

प्रहरीका अनुसार बाढीबाट सबैभन्दा बढी प्रभावित चितवनमा २६४ जनाको शव फेला परेको छ ।

त्यसैगरी पूर्वी नवलपरासीमा १९४, पश्चिम नवलपरासीमा १००, गोरखामा ५८, नुवाकोटमा ५२, धादिङमा ५०, तनहुँमा ३७ र रसुवामा १३ जनाको शव भेटिएको छ ।

बाढीपछि नदीले बगाएर ल्याएका तथा विभिन्न स्थानमा फसेका नागरिकको खोजी, उद्धार र उपचारलाई प्रहरीले निरन्तरता दिइरहेको जनाएको छ ।

प्रहरीका अनुसार हालसम्म २ हजार ७१५ जना घाइते तथा अन्य व्यक्तिको उद्धार गरिएको छ ।

यसैबीच, काठमाडौं उपत्यकाका विभिन्न अस्पतालमा उपचाररत घाइतेमध्ये १६० जना उपचारपछि घर फर्किएका छन् । अस्पतालमा रहेका अन्य घाइतेको उपचार जारी रहेको प्रहरीले जनाएको छ ।

भोटेकोशीमा आएको बाढीले रसुवासहित त्रिशूली र नारायणी नदी आसपासका जिल्लामा ठूलो जनधनको क्षति पुर्याएको छ ।

बाढी प्रभावित क्षेत्रमा बेपत्ताको खोजी, शव संकलन तथा उद्धार कार्यलाई तीव्रता दिइएको प्रहरीले जनाएको छ ।