जनकपुरधाम, १२ भदौ । रसुवास्थित प्रहरी चौकी बेत्रावतीमा कार्यरत प्रहरी सहायक निरीक्षक (असई) रामकाजी पौडेलको शव चितवनमा फेला परेको छ ।

तिब्बततर्फबाट भोटेकोशी नदीमा आएको बाढीमा परेर बेपत्ता भएका पौडेलको शव चितवनमा फेला परेको हो ।

नुवाकोट घर भएका ४३ वर्षीय पौडेल बाढीपछि सम्पर्कविहीन भएका थिए । खोजीका क्रममा उनको शव चितवनमा फेला परेको जिल्ला प्रहरी कार्यालय चितवनका डीएसपी चन्द्रभूषण यादवले जानकारी दिए ।

पौडेलको शव जिल्ला अस्पताल चितवनमा पोस्टमार्टम गरेपछि परिवारलाई जिम्मा लगाइएको प्रहरीले जनाएको छ ।

यसैबीच, चितवनमा फेला परेको अर्को एक शवको पनि पहिचान खुलेको छ । बाँकेको कोहलपुर नगरपालिका–११ का २३ वर्षीय कविलाल चौधरीको शव रहेको खुलेको हो ।

चौधरीको शवसमेत आवश्यक प्रक्रिया पूरा गरी परिवारको जिम्मा लगाइएको डीएसपी यादवले बताए ।

पछिल्लो समय भोटेकोशी तथा त्रिशूली नदीमा आएको बाढीपछि विभिन्न जिल्लामा शव फेला पर्ने क्रम जारी छ ।

प्रहरीले बेपत्ता व्यक्तिको खोजी तथा फेला परेका शवको पहिचान गर्ने कार्यलाई निरन्तरता दिइरहेको जनाएको छ ।