बारा, २६ बैशाख । बाराको निजगढ नगरपालिका–९ स्थित गुरुङ होटलमा एक युवती मृत अवस्थामा फेला परेपछि प्रहरीले हत्या आशङ्कामा तीन जनालाई नियन्त्रणमा लिएर अनुसन्धान अघि बढाएको छ ।

जिल्ला प्रहरी कार्यालय बाराका प्रहरी उपरीक्षक नरेन्द्र कुवँरका अनुसार निजगढ नगरपालिका–१२ कोलगाउँ निवासी १९ वर्षीया सीता थिङ होटलको कोठाभित्र अचेत अवस्थामा फेला परेकी थिइन् ।

उनलाई तत्काल उपचारका लागि निजगढ सामुदायिक अस्पताल लगिएको भए पनि चिकित्सकले मृत घोषणा गरेका थिए ।

प्रारम्भिक अनुसन्धानमा युवतीको घाँटी थिचेर हत्या गरिएको हुन सक्ने आशङ्का गरिएको प्रहरीले जनाएको छ ।

घटनापछि होटलमा उनीसँगै रहेका दुई पुरुष र एक महिलालाई नियन्त्रणमा लिएर सोधपुछ भइरहेको छ ।

प्रहरीका अनुसार पक्राउ परेकाहरूको परिचय अनुसन्धान प्रभावित हुन सक्ने भएकाले हाल सार्वजनिक गरिएको छैन ।

घटनास्थलबाट आवश्यक प्रमाणहरू सङ्कलन गरिएको र शव पोस्टमार्टमका लागि तयारी अवस्थामा राखिएको इलाका प्रहरी कार्यालय निजगढले जनाएको छ ।

पोस्टमार्टम रिपोर्टपछि मृत्युको वास्तविक कारण स्पष्ट हुने प्रहरीले बताएको छ ।

प्रहरीले घटनाबारे सबै कोणबाट अनुसन्धान भइरहेको र दोषी पुष्टि भए कानुनी कारबाही गरिने जनाएको छ ।