जनकपुरधाम, १६ बैशाख । मैथिली भाषा, साहित्य र रंगमञ्चको इतिहासमा एक महत्वपूर्ण अध्याय थपिएको छ ।

एकै नाटककारद्वारा सिर्जित ३५ वटा नाटकलाई ३५ जना फरक फरक निर्देशकले मञ्चन गर्ने भव्य सांस्कृतिक अभियानमार्फत विश्वमै नयाँ कीर्तिमान कायम गरिएको हो ।

करिब ८ हजार स्रष्टा, कलाकार तथा प्राविधिकहरूको सहभागिताले उक्त कार्यक्रमलाई अभूतपूर्व बनाएको छ ।

यो ऐतिहासिक उपलब्धि वरिष्ठ नाटककार महेन्द्र मलंगियाको सिर्जनशीलताको परिणामका रूपमा लिइएको छ । उनका नाटकहरूलाई विभिन्न निर्देशकहरूले आफ्नै शैली र दृष्टिकोणमा प्रस्तुत गर्दा मिथिला रंगमञ्चको विविधता र गहिराइ उजागर भएको सहभागीहरूले बताएका छन् ।

यसै उपलब्धिका आधारमा उक्त प्रस्तुति ‘गिनीज बुक अफ वर्ल्ड रेकर्ड’ मा सूचीकृत हुन सफल भएको जनाइएको छ ।

कार्यक्रममा नेपालका विभिन्न शहरदेखि भारतको राजधानी दिल्लीसम्मका कलाकार र संस्थाहरूको सहभागिता रहेको थियो ।

काठमाडौँस्थित ‘रंग सूत्र नेपाल’ ले प्रस्तुत गरेको नाटक ‘देह पर कोठी खसादिय’ विशेष आकर्षणको केन्द्र बनेको थियो । त्यस्तै, जनकपुरधामको ‘मिनाप’ समूहले मञ्चन गरेको मौलिक नाटकले दर्शकबाट व्यापक प्रशंसा बटुल्न सफल भयो ।

आयोजकका अनुसार कार्यक्रमले मैथिली रंगमञ्चको सामूहिक शक्ति, सृजनात्मकता र सांस्कृतिक पहिचानलाई अन्तर्राष्ट्रिय स्तरमा चिनाउने महत्वपूर्ण अवसर प्रदान गरेको छ ।

विविध शैली, कथावस्तु र प्रस्तुति विधिले भरिपूर्ण यी नाटकहरूले दर्शकलाई मनोरञ्जन मात्र नभई सामाजिक सन्देश पनि दिएका थिए ।

दर्शकहरूको उल्लेख्य उपस्थिति र उत्साहजनक प्रतिक्रियाले कार्यक्रमको सफलतालाई थप मजबुत बनाएको छ । सहभागी कलाकारहरूले यस्तो खालको ऐतिहासिक प्रयासले भविष्यमा अझ ठूला सांस्कृतिक अभियानहरू सञ्चालन गर्न प्रेरणा मिल्ने विश्वास व्यक्त गरे ।

यो उपलब्धिले मैथिली भाषा र साहित्यको प्रवर्द्धनमा मात्र नभई समग्र नेपाली रंगमञ्चलाई अन्तर्राष्ट्रिय स्तरमा प्रतिस्पर्धी बनाउन पनि टेवा पुग्नेछ । साथै, यसले युवा पुस्तालाई रंगमञ्चतर्फ आकर्षित गर्दै सांस्कृतिक सम्पदाको संरक्षणमा नयाँ ऊर्जा थप्ने विश्वास गरिएको छ ।

यस ऐतिहासिक कीर्तिमानसँगै मिथिलाले फेरि एकपटक आफ्नो सांस्कृतिक समृद्धि र सृजनशील क्षमताको परिचय विश्वसामु प्रस्तुत गरेको छ ।