जनकपुरधाम, १० बैशाख । धनुषा र सिरहा जिल्ला जोड्ने कमला नदीमा नयाँ पुल निर्माण कार्य लामो समयदेखि अघि नबढाइएको भन्दै स्थानीय स्तरमा असन्तुष्टि चुलिएको छ ।

नयाँ कमला पुल निर्माण संघर्ष समितिले तत्काल प्रक्रिया सुरु गर्न माग गर्दै सात दिनको अल्टिमेटमसहित आन्दोलनको चेतावनी दिएको छ ।

समितिले मधेश प्रदेशका मुख्यमन्त्री कृष्णप्रसाद यादवलाई स्मरणपत्र बुझाउँदै २०८१ भदौ ७ गते प्रदेश सरकारसँग भएको सहमति अहिलेसम्म कार्यान्वयन नभएको गुनासो गरेको छ ।

दुई वर्ष बित्न लाग्दा पनि पुल निर्माणको ठेक्का प्रक्रिया सुरु नगरिएको भन्दै जनतालाई भ्रममा राखिएको आरोप लगाइएको छ ।

स्मरणपत्रमा चालु आर्थिक वर्ष २०८२/८३ समाप्त हुन लाग्दासमेत निर्माण प्रक्रिया अघि नबढाइएको र जीर्ण अवस्थामा रहेको पुरानो पुलको प्रभावकारी मर्मतसमेत हुन नसकेको उल्लेख छ ।

केन्द्र सरकारबाट पटक पटक म्याद थपिँदा नागरिकमा अन्योल बढेको भन्दै समितिले आपत्ति जनाएको छ ।

समितिका अनुसार हाल प्रस्तावित पुलको डिजाइनमै त्रुटि रहेको र सम्बन्धित बाँध निर्माणको ठेक्का प्रक्रियासमेत अघि नबढेकाले भविष्यमा समस्या झन् जटिल बन्न सक्ने चेतावनी दिइएको छ ।

स्मरणपत्र बुझ्दै मुख्यमन्त्री यादवले पुल निर्माणका लागि प्रदेश सरकारले पटक पटक पहल गरेको र बजेटसमेत विनियोजन गरिएको भए पनि प्रक्रिया अघि बढ्न नसकेको स्वीकार गरे ।

उनले उक्त परियोजना संघीय सरकारको क्षेत्राधिकारभित्र पर्ने भएकाले आवश्यक पहलका लागि संघ सरकारसँग समन्वय गर्ने प्रतिबद्धता जनाए ।

यता, संघर्ष समितिले सात दिनभित्र ठेक्का प्रक्रिया अघि नबढाइए कडा आन्दोलनमा उत्रिने घोषणा गरेको छ ।

आन्दोलनका कार्यक्रमअन्तर्गत अनसन, चक्काजाम तथा सडक अवरोधजस्ता गतिविधि सञ्चालन गरिने चेतावनी दिँदै त्यसबाट उत्पन्न हुने अवस्थाको जिम्मेवारी सम्बन्धित निकायले लिनुपर्ने जनाएको छ ।