जनकपुरधाम, २१ चैत । सामान्य देखिने मोबाइल किनबेचसम्बन्धी विवादले जनकपुरधाममा भयावह मोड लिँदा एक युवक गम्भीर घाइते भएका छन् ।

शुक्रबार जनकपुरधाम उपमहानगरपालिका–२ स्थित एक मोबाइल पसलमा भएको खुकुरी आक्रमणले सिंगो क्षेत्रलाई स्तब्ध बनाएको छ ।

प्रहरीका अनुसार ‘मोबाइल मल’ नामक पसलमा मोबाइल खरिदसम्बन्धी विवाद चर्किँदा ग्राहक निर्भय मिश्राले पसलमा कार्यरत नवीन कुसियैतमाथि खुकुरी प्रहार गरेका थिए । प्रत्यक्षदर्शीहरूका अनुसार सामान्य भनाभनबाट सुरु भएको विवाद केहीबेरमै नियन्त्रण बाहिर गएको थियो ।

धनुषा प्रहरीका प्रवक्ता गणेशबहादुर बमले भने, ‘दुवै पक्षबीच मोबाइलको किस्ता तिर्ने विषयमा विवाद भएको देखिन्छ । सोही क्रममा आक्रमणकारीले चारदेखि पाँच पटकसम्म खुकुरी प्रहार गरेका छन् ।’ उनका अनुसार घटनाको प्रकृति गम्भीर रहेको र विस्तृत अनुसन्धान भइरहेको छ ।

गम्भीर घाइते कुसियैतलाई तत्कालै प्रादेशिक अस्पताल जनकपुरधाममा भर्ना गरिएको छ । चिकित्सकका अनुसार उनको अवस्था चिन्ताजनक भए पनि उपचार जारी रहेको छ । टाउको र शरीरका विभिन्न भागमा गहिरो चोट लागेको बताइएको छ ।

उता, घटनामा संलग्न मिश्रालाई प्रहरीले घटनास्थलबाटै नियन्त्रणमा लिएको छ । हाल उनीमाथि ज्यान मार्ने उद्योगअन्तर्गत मुद्दा दर्ता गर्ने तयारी भइरहेको प्रहरीले जनाएको छ ।

पसल सञ्चालक सदाम राइनका अनुसार मिश्राले करिब ६ महिना अघि ईएमआई (किस्ता प्रणाली) मा मोबाइल खरिद गरेका थिए । ‘तीन महिनादेखि किस्ता नतिरेपछि हाम्रो कर्मचारीले बारम्बार ताकेता गर्दै आएका थिए । त्यही विषयमा विवाद बढ्दै जाँदा यस्तो अप्रिय घटना भयो,’ उनले भने ।

स्थानीय व्यवसायीहरूका अनुसार पछिल्लो समय किस्ता प्रणालीमा सामान खरिद गर्ने र भुक्तानी नगर्ने समस्या बढ्दो क्रममा रहेको छ । यसले व्यापारी र ग्राहकबीच तनाव सिर्जना गर्ने गरेको उनीहरूको भनाइ छ ।

प्रहरीले घटनाको वास्तविक कारण र पृष्ठभूमि पत्ता लगाउन थप अनुसन्धान जारी राखेको जनाएको छ ।