-ज्योति झा
चितवन ८, चैत । चितवनको सौराहा पछिल्लो समय नेपालको प्रमुख पर्यटकीय गन्तव्यका रूपमा अझ सशक्त बन्दै गएको छ ।

प्राकृतिक सौन्दर्य, शान्त वातावरण र विविध पर्यटकीय गतिविधिका कारण स्वदेशी तथा विदेशी पर्यटकको रोजाइमा परेको सौराहाले स्थानीय अर्थतन्त्रलाई उल्लेखनीय रूपमा चलायमान बनाएको छ ।

विशेषगरी चितवन राष्ट्रिय निकुञ्ज नजिकै रहेको सौराहा जङ्गल सफारीका लागि प्रसिद्ध छ ।

हात्ती सफारी, जीप सफारी, डुंगा सयर तथा वन्यजन्तु अवलोकनका लागि यहाँ आउने पर्यटकको संख्या वर्षेनी बढ्दो छ ।

दुर्लभ एकसिङ्गे गैँडा, बाघ, हरिणलगायतका वन्यजन्तु प्रत्यक्ष अवलोकन गर्न पाइने भएकाले सौराहा साहसिक तथा प्राकृतिक पर्यटनको केन्द्र बनेको छ ।

सौराहाको अर्को आकर्षण यसको शान्त र सफा वातावरण हो । सडकहरू तुलनात्मक रूपमा सफा देखिन्छन् भने पर्यटकमैत्री सेवा–सुविधाले यहाँको अनुभवलाई थप सहज बनाएको छ ।

पर्यटकलाई गन्तव्यसम्म पुर्‍याउन प्रयोग हुने रिक्सा, टेम्पो तथा अन्य साना सवारी साधनहरू पनि व्यवस्थित रूपमा सञ्चालन हुँदै आएका छन् ।

यहाँका होटल, रिसोर्ट तथा साना–ठूला व्यवसायहरू पर्यटकको आगमनसँगै फस्टाउँदै गएका छन् । साना चिया पसलदेखि ठूला होटलसम्मले राम्रो आम्दानी गरिरहेका छन् ।

स्थानीय व्यापारीहरूका अनुसार पर्यटकको भीडभाड बढेसँगै व्यापारमा उल्लेख्य वृद्धि भएको छ । यसले रोजगारी सिर्जनामा समेत टेवा पुर्‍याएको छ ।

तर, पर्यटनसँगै केही चुनौतीहरू पनि देखा परेका छन् । सौराहामा वस्तु तथा सेवाको मूल्य अपेक्षाकृत महँगो हुने गुनासो पर्यटकहरूले गर्ने गरेका छन् ।

खाना, बसोबास र अन्य सेवामा मूल्य वृद्धि हुँदा मध्यम वर्गीय पर्यटकलाई केही असहज महसुस हुने गरेको देखिन्छ ।

यद्यपि, यी चुनौतीबीच पनि सौराहा नेपालको पर्यटन उद्योगको एउटा सफल नमुना बनेको मान्न सकिन्छ ।

प्राकृतिक सौन्दर्य, साहसिक गतिविधि र स्थानीय आतिथ्यताले भरिएको सौराहा आगामी दिनमा अझ व्यवस्थित र दिगो पर्यटन विकासतर्फ अघि बढ्ने विश्वास गर्न सकिन्छ ।