जनकपुरधाम, २९ फागुन । जनकपुरधाममा ट्राफिक व्यवस्थापन सुधार गर्न ट्राफिक प्रहरीले राखेका ‘फ्लेक्सिबल रिफ्लेक्टिभ पोल’ नै हटाएर सवारीसाधन चलाउने प्रवृत्ति देखिएको छ ।

ट्राफिक व्यवस्थापनलाई व्यवस्थित बनाउने उद्देश्यले सडकको बीचभागमा जडान गरिएका ती पोललाई केही मोटरसाइकल चालकले आफ्नै सुविधाका लागि हटाउँदै बीचबाटै बाटो काट्ने गरेको दृश्य सार्वजनिक भएको छ ।

सामाजिक सञ्जालमा भाइरल भएका तस्बिरहरूमा मोटरसाइकल चालकहरूले सडकको बीचभागमा जडान गरिएका पोललाई हातले सार्दै बाइक निकालिरहेको देखिन्छ ।

पोलको उद्देश्य सवारीसाधनलाई निर्धारित लेनमा राख्दै अनावश्यक यू–टर्न र बीचबाट बाटो काट्ने प्रवृत्ति रोक्नु हो । तर, केही चालकहरूले नियमलाई बेवास्ता गर्दै ती पोललाई नै हटाएर आफ्नो बाटो बनाइरहेको दृश्यले ट्राफिक नियमप्रति जनचेतनाको अभाव झल्काएको छ ।

जनकपुरधामका व्यस्त सडकहरूमा सवारी दुर्घटना घटाउन र ट्राफिक व्यवस्थापनलाई व्यवस्थित बनाउन जिल्ला ट्राफिक प्रहरी कार्यालय धनुषाले विभिन्न स्थानमा यस्ता पोल जडान गर्दै आएको छ ।

विशेषगरी व्यस्त चोकमध्येको एक रामानन्द चोकमा सवारीको अव्यवस्थित आवागमनलाई नियन्त्रण गर्न यो उपाय अपनाइएको हो ।

तर, ट्राफिक व्यवस्थापनका लागि गरिएका प्रयासलाई नै चुनौती दिने गरी केही चालकहरूले नियम उल्लंघन गर्न थालेपछि ट्राफिक प्रहरी चिन्तित बनेको छ ।

ट्राफिक प्रहरी प्रमुख सूर्यबहादुर शाहीका अनुसार यस्ता पोल जडानको उद्देश्य सडक सुरक्षालाई प्राथमिकता दिनु हो । तर, केही व्यक्तिको लापरवाहीले समग्र प्रयास कमजोर बन्ने खतरा देखिएको छ ।

स्थानीय बासिन्दाहरूका अनुसार जनकपुरधामका धेरै सडकमा सवारी चालकले छोटो बाटो खोज्ने प्रवृत्ति बढ्दो छ । यसका कारण बीचबाटै सडक काट्ने, गलत दिशाबाट सवारी चलाउने तथा ट्राफिक संकेतको बेवास्ता गर्ने जस्ता गतिविधि बढ्दै गएको छ । यस्तो व्यवहारले दुर्घटनाको जोखिम समेत बढाउने उनीहरूको भनाइ छ ।

ट्राफिक प्रहरीका अधिकारीहरूले सडकमा जडान गरिएका संरचना हटाउने वा क्षति पुर्‍याउने काम गैरकानुनी भएको भन्दै चेतावनी दिएका छन् । यदि कसैले यस्ता संरचना हटाएर सवारी चलाएको पाइएमा कारबाही गर्ने तयारी रहेको प्रहरीले जनाएको छ ।

ट्राफिक व्यवस्थापन सुधारका लागि प्रहरीले प्रविधिमैत्री उपाय अपनाउँदै सडक चिन्ह, पोल र अन्य संरचना जडान गरिरहे पनि त्यसको प्रभावकारिता भने सर्वसाधारणको सहयोगबिना सम्भव नहुने देखिएको छ ।

नियम पालना नगर्ने प्रवृत्ति कायम रहेमा दुर्घटना नियन्त्रण र व्यवस्थित ट्राफिक प्रणाली निर्माण गर्ने प्रयास सफल हुन नसक्ने जानकारहरू बताउँछन् ।

जनकपुरधाम जस्तो धार्मिक तथा पर्यटकीय शहरमा दैनिक हजारौँ सवारीसाधन आवतजावत गर्ने भएकाले ट्राफिक अनुशासन झन् महत्वपूर्ण मानिन्छ । त्यसैले ट्राफिक व्यवस्थापनका लागि गरिएका संरचनालाई जोगाउँदै नियम पालना गर्न सर्वसाधारणलाई आग्रह गरिएको छ ।