जनकपुरधाम, ९ फागुन । धनुषामा राधे राधे मिथिलानी ग्रुपद्वारा होली मिलन समारोह भव्य रूपमा सम्पन्न गरिएको छ ।

सांस्कृतिक वातावरण, परम्परागत गीत संगीत र सामूहिक सहभागिताबीच आयोजित कार्यक्रममा महिलाहरूको उल्लेखनीय उपस्थिति रहेको थियो ।

कार्यक्रमले समुदायमा एकता, सद्भाव र सामाजिक सेवा अभियानलाई थप सुदृढ गर्ने सन्देश दिएको आयोजकले जनाएको छ ।

समारोहमा ग्रुपकी धनुषा जिल्ला अध्यक्ष अर्चना झाले संस्थाले समाजमा सकारात्मक परिवर्तनका लागि निरन्तर काम गरिरहेको बताइन् ।

उनले शिक्षा, गरिबी निवारण, महिला सशक्तीकरण तथा सामाजिक सेवाका क्षेत्रमा ग्रुपले विभिन्न कार्यक्रम सञ्चालन गर्दै आएको उल्लेख गरिन् ।

झाले भनिन्, ‘हामी पर्व मनाउने समूह मात्र नभई समाजमा आवश्यक सहयोग पुर्‍याउने उद्देश्यले गठन भएको संस्था हौं । विपन्न परिवारका बालबालिकाको शिक्षामा सहयोग, स्वास्थ्य सामग्री वितरण, तथा आपत्कालीन अवस्थामा राहत प्रदान गर्ने कामलाई प्राथमिकतामा राखेका छौं ।’

उनका अनुसार पछिल्लो समय ग्रामीण क्षेत्रका छात्रछात्रालाई शैक्षिक सामग्री वितरण, ट्युशन सहयोग र जनचेतनामूलक कार्यक्रममार्फत ग्रुपले शिक्षा क्षेत्रमा महत्वपूर्ण योगदान पुर्‍याएको छ ।

साथै, आर्थिक रूपमा कमजोर परिवारलाई स्वरोजगारमुखी तालिम उपलब्ध गराउने योजना पनि अघि बढाइएको उनले जानकारी दिइन् ।

कार्यक्रममा सहभागी वक्ताहरूले होली जस्ता पर्वले सामाजिक सम्बन्ध बलियो बनाउने र सामूहिक भावना विकास गर्ने उल्लेख गर्दै यस्ता अवसरलाई सामाजिक अभियानसँग जोड्नुपर्नेमा जोड दिएका थिए ।

सहभागी महिलाहरूले पनि ग्रुपको गतिविधिले समुदायमा सकारात्मक प्रभाव परेको अनुभव साझा गरेकी थिइन् ।

ग्रुपले गरिबी निवारणका लागि साना आयआर्जन कार्यक्रम, महिला बचत समूह निर्माण र उद्यमशीलता प्रवर्द्धनमा जोड दिएको जनाइएको छ ।

अध्यक्ष झाले आगामी दिनमा स्वास्थ्य शिविर, छात्रवृत्ति कार्यक्रम तथा वातावरण संरक्षण अभियान सञ्चालन गर्ने योजना रहेको बताइन् ।

होली मिलन समारोहमा सांस्कृतिक प्रस्तुति, रंग आदानप्रदान र शुभकामना आदानप्रदानसँगै सामाजिक सेवाका आगामी कार्यक्रमबारे छलफल समेत गरिएको थियो ।

आयोजकका अनुसार यस्ता कार्यक्रमले समुदायबीच सहकार्य बढाउने र सामाजिक उत्तरदायित्वप्रति नागरिकलाई प्रेरित गर्ने विश्वास गरिएको छ ।

समारोहमा सहभागीहरूले होलीको शुभकामना आदानप्रदान गर्दै शिक्षा, सहयोग र सामाजिक सद्भावको सन्देश फैलाउने प्रतिबद्धता व्यक्त गरेका थिए ।

आयोजकले भविष्यमा अझ व्यापक सहभागितासहित सामाजिक अभियानलाई निरन्तरता दिने जनाएको छ ।