जनकपुरधाम, ८ फागुन । धनुषा निर्वाचन क्षेत्र नम्बर–३ मा परमेश्वर साहले घरदैलो अभियानलाई तीव्र बनाएका छन् ।

जनता समाजवादी पार्टी नेपालका तर्फबाट प्रतिनिधिसभा सदस्यका उम्मेदवार साहले शुक्रबार जनकपुरधाम उपमहानगरपालिकाको वडा नम्बर ३ र २५ मा मतदातासँग प्रत्यक्ष संवाद गरेका हुन् ।

घरदैलोका क्रममा साहले पार्टीको चुनाव चिह्न ‘छाता’मा मतदान गरी आफूलाई विजयी बनाउन आग्रह गरे ।

उनले जनताको आवाज, पहिचान र अधिकारलाई सशक्त बनाउन आफू उम्मेदवारी लिएर मैदानमा उत्रिएको बताउँदै स्थानीय विकासलाई केन्द्रमा राखेर काम गर्ने प्रतिबद्धता व्यक्त गरे ।

साहले शिक्षा, स्वास्थ्य सेवा सुधार, रोजगारी सिर्जना तथा पूर्वाधार विकासलाई प्राथमिकतामा राख्दै आफ्ना योजनाबारे मतदातालाई जानकारी गराएका थिए ।

जनताको आवश्यकता र आकांक्षाअनुसार सबै वडामा समान रूपमा विकासका कार्यक्रम अघि बढाइने उनको भनाइ थियो ।

‘समृद्धि हासिल गर्न अब हामी एकजुट हुनुपर्छ,’ उनले जोड दिँदै धनुषा–३ को समग्र विकासका लागि साझा प्रयास आवश्यक रहेको बताए ।

कार्यक्रममा सहभागी मतदाताले साहसँग विभिन्न विषयमा प्रश्न गर्दै उनका योजनाबारे चासो व्यक्त गरेका थिए । विशेषगरी महिला तथा युवाले शिक्षा र रोजगारीसम्बन्धी स्पष्ट योजनाप्रति उत्साह देखाएको स्थानीयले बताए ।

घरदैलो अभियानलाई लोकतान्त्रिक अभ्यासको महत्वपूर्ण माध्यम बताउँदै साहले प्रत्यक्ष भेटघाटबाट प्रत्येक परिवारको समस्या बुझ्न र समाधानका उपाय प्रस्तुत गर्न सहज हुने विश्वास व्यक्त गरे ।

उनका अनुसार जनताको सहभागिता नै अभियानको मुख्य आधार रहनेछ ।