जनकपुरधाम, १ फागुन । जनकपुरधाममा रूखमा झुन्डिएको अवस्थामा एक अज्ञात युवकको शव फेला परेको छ ।

जनकपुरधाम उपमहानगरपालिका वडा नम्बर-२२ बसबिट्टीस्थित धनुषा–महोत्तरी सीमा नजिकको रोईयाहा पोखरीको छेउमा रहेको खोला किनारमा अज्ञात युवकको शव जामुनको रुखमा झुण्डिएको अवस्थामा फेला परेको हो ।

जनकपुरधाम उपमहानगरपालिका वडा नम्बर-२२ का वडाध्यक्ष विमलेश मिश्रको पहलमा घटनास्थलमा प्रहरी पुगेर आवश्यक अनुसन्धान सुरु गरेको छ ।

प्रहरीका अनुसार शवलाई प्रक्रियाअनुसार सुरक्षित गरी प्रादेशिक अस्पताल जनकपुरधाममा पठाइएको छ ।

हाल मृतकको पहिचान हुन सकेको छैन । घटनाको वास्तविक कारण पत्ता लगाउन अनुसन्धान जारी रहेको प्रहरीले जानकारी दिएको छ ।

वडाध्यक्ष मिश्रले घटनाबारे छिटो अनुसन्धान गरी अपराधमा संलग्न व्यक्ति पत्ता लगाउने र स्थानीय सुरक्षामा ध्यान दिन सुरक्षा निकायलाई आग्रह गरेको बताए ।