जनकपुरधाम, ९ पुष । धनुषा जिल्लाका विभिन्न स्थानबाट फरक फरक मितिमा मोटरसाइकल चोरी गरी अवैध रूपमा खरिद बिक्री गर्दै आएको एक संगठित गिरोहलाई धनुषा प्रहरीले नियन्त्रणमा लिएको छ ।

प्रहरीका अनुसार चोरी तथा बिक्री वितरण कार्यमा संलग्न सिकिन्द्र यादवसहित १२ जनालाई पक्राउ गरी उनीहरूको कब्जाबाट चोरी गरिएका ११ थान मोटरसाइकल बरामद गरिएको हो ।

जिल्ला प्रहरी कार्यालय धनुषाले पछिल्लो समय जिल्लाका विभिन्न ठाउँमा मोटरसाइकल चोरीका घटना बढ्दै गएको भन्दै विशेष निगरानी र अनुसन्धान अभियान सञ्चालन गरेको थियो । सोही क्रममा प्राप्त गोप्य सूचनाका आधारमा प्रहरीले चरणबद्ध रूपमा अनुसन्धान गर्दै जाँदा चोरीको मोटरसाइकल संकलन गरी बिक्री गर्ने समूह सक्रिय रहेको खुलेको हो ।

प्रहरी स्रोतका अनुसार उक्त समूहले सार्वजनिक स्थान, बजार क्षेत्र, अस्पताल, शैक्षिक संस्था आसपास तथा आवासीय क्षेत्रबाट मोटरसाइकल चोरी गर्ने, नम्बर प्लेट परिवर्तन गर्ने तथा कम मूल्यमा बेचबिखन गर्ने गरेको प्रारम्भिक अनुसन्धानबाट खुलेको छ ।

चोरी गरिएका मोटरसाइकलहरू विभिन्न व्यक्तिलाई प्रयोग गर्न दिइने वा अन्य जिल्लामा समेत बिक्री गर्ने योजना रहेको प्रहरीको भनाइ छ ।

पक्राउ परेका व्यक्तिहरूलाई नियन्त्रणमा लिएर जिल्ला प्रहरी कार्यालय धनुषामा आवश्यक कानुनी प्रक्रिया अघि बढाइएको छ ।

हाल उनीहरूलाई चोरी तथा संगठित अपराधसम्बन्धी मुद्दामा थप अनुसन्धान भइरहेको प्रहरीले जनाएको छ ।

अनुसन्धानका क्रममा यस समूहसँग सम्बन्धित अन्य व्यक्ति तथा चोरी भएका थप सवारी साधनहरू फेला पर्ने सम्भावना रहेको भन्दै प्रहरीले अनुसन्धानलाई तीव्र बनाएको छ ।

जिल्ला प्रहरी कार्यालय धनुषाले आम नागरिकलाई सवारी साधन पार्क गर्दा सावधानी अपनाउन, शंकास्पद गतिविधि देखिएमा तुरुन्त प्रहरीलाई जानकारी गराउन अनुरोध गरेको छ ।

साथै, मोटरसाइकल चोरीजस्ता अपराध नियन्त्रणका लागि प्रहरीको सक्रियता निरन्तर रहने जनाउँदै दोषीमाथि कानुनअनुसार कडा कारबाही गरिने प्रतिबद्धता व्यक्त गरेको छ ।