जनकपुरधाम, ८ पुष । जनकपुरधाममा विद्यालयस्तरका खेलाडीको प्रतिभा पहिचान र क्रिकेटको विकासलाई लक्षित गर्दै पाँचौँ अन्तरविद्यालय क्रिकेट प्रतियोगिता बुधबारदेखि सुरु हुन लागेको छ ।

स्थानीय रंगभूमी मैदानमा जनकपुर स्पोर्ट्स क्लब र न्यू भिजन नेपालको संयुक्त आयोजनामा प्रतियोगिता सञ्चालन हुन लागेको हो ।

प्रतियोगिताको पूर्वसन्ध्यामा मंगलबार जनकपुरधाम उपमहानगरपालिकाका नगर प्रमुख मनोज कुमार साह र उपमहानगरपालिकामा कार्यरत सफाइ कर्मचारी सिताराम मेस्तरले संयुक्त रूपमा ट्रफी अनावरण गरेका छन् ।

ट्रफी अनावरण कार्यक्रममा समाजका सबै वर्ग र पेशाप्रति समान सम्मानको सन्देश प्रवाह गर्न जनप्रतिनिधि र कर्मचारीलाई सहभागी गराइएको आयोजकले जनाएको छ ।

राष्ट्रिय क्रिकेट खेलाडी हरिशंकर साहले समाज रूपान्तरणका लागि खेललाई माध्यम बनाउँदै सम्मान, समावेशिता र समानताको सन्देश व्यवहारमै लागू गर्न ट्रफी अनावरण कार्यक्रम फरक ढंगले आयोजना गरिएको बताए ।

उनका अनुसार प्रतियोगितामा जनकपुरधामसहित आसपासका २४ वटा विद्यालयका टिमले सहभागिता जनाउनेछन् ।

प्रतियोगिताको उद्घाटन खेल बुधबार मदर टेरेसा स्कुल र याज्ञवल्क्य संस्कृत माध्यमिक विद्यालय ज्ञानकुपबीच हुनेछ । विगत वर्ष सम्पन्न भएको यही प्रतियोगिताको उपाधि मदर टेरेसाले जितेको थियो ।

आयोजक संस्थाका प्रतिनिधि प्रशान्त अरवीन्दले विद्यालयस्तरबाटै खेल र खेलाडीको विकास गर्नु प्रतियोगिताको मुख्य उद्देश्य रहेको बताए ।

‘स्थानीय स्तरमै खेलाडी उत्पादन गर्ने, उनीहरूलाई प्रतिस्पर्धात्मक वातावरण दिने र दीर्घकालीन रूपमा राष्ट्रिय स्तरसम्म पुर्‍याउने लक्ष्यसहित हरेक वर्ष प्रतियोगिता आयोजना गर्दै आएका छौँ,’ उनले भने ।

प्रतियोगिताका खेलहरू बाह्रविघा मैदानमा तय तालिकाअनुसार सञ्चालन हुने आयोजकले जनाएको छ ।

खेलप्रेमी दर्शक, अभिभावक तथा सरोकारवालालाई खेल हेरेर विद्यालयस्तरका खेलाडीलाई हौसला प्रदान गर्न पनि आयोजकले आग्रह गरेको छ ।