जनकपुरधाम, ३ पुष । महोत्तरी गाउँपालिकामा आयोजना हुन लागेको मेयर कप क्रिकेट प्रतियोगितालाई लक्षित गर्दै स्थानीय युवाखेलाडीहरूको मनोबल उच्च बनाउने उद्देश्यले क्रिकेट किट वितरण गरिएको छ ।

छाला तथा यौन रोग विशेषज्ञ डाक्टर रामज्ञान यादवले गाउँपालिकाका होनहार युवा क्रिकेटरहरूलाई क्रिकेट किट हस्तान्तरण गर्दै खेलकुदमार्फत युवाको क्षमता उजागर गर्न सानो तर अर्थपूर्ण पहल गरिएको बताएका छन् ।

किट वितरण गर्दै डा. यादवले खेल सामग्री प्रदान गर्नु केवल उपकरण हस्तान्तरण मात्र नभई युवाप्रति गरिएको विश्वास, हौसला र आत्मविश्वास भएको उल्लेख गरे ।

‘युवाहरूमा अथाह सम्भावना छ, आवश्यक अवसर र समर्थन पाउँदा उनीहरूले गाउँ, जिल्ला हुँदै देशको नाम चम्काउन सक्छन्,’ उनले भने।

उनका अनुसार खेलकुदले शारीरिक स्वास्थ्य मात्र नभई अनुशासन, टोली भावना, नेतृत्व क्षमता र सकारात्मक प्रतिस्पर्धाको विकासमा महत्वपूर्ण भूमिका खेल्छ । यस्ता गुणहरूकै माध्यमबाट जिम्मेवार र सचेत नागरिक तयार हुने भएकाले स्थानीय तहले खेलकुदलाई प्राथमिकतामा राख्नुपर्ने उनले जोड दिए ।

क्रिकेट किट प्राप्त गरेका खेलाडीहरूले सहयोगप्रति आभार व्यक्त गर्दै मेयर कप क्रिकेट प्रतियोगितामा उत्कृष्ट प्रदर्शन गर्ने प्रतिबद्धता जनाएका छन् । खेलाडीहरूका अनुसार यस प्रकारको सहयोगले आफूहरूलाई थप मेहनत गर्न र लक्ष्यमा केन्द्रित रहन प्रेरणा मिलेको छ ।

स्थानीय खेलप्रेमी र अभिभावकहरूले पनि निजी क्षेत्र र सामाजिक व्यक्तित्वहरूबाट खेलकुदमा देखाइएको सहयोगको प्रशंसा गरेका छन् । उनीहरूका अनुसार सीमित स्रोतसाधनका बीच खेल अभ्यास गरिरहेका युवाका लागि यस्ता पहलले ठूलो अर्थ राख्छ ।

महोत्तरी गाउँपालिकामा आयोजना हुने मेयर कप क्रिकेट प्रतियोगितालाई स्थानीयस्तरको महत्वपूर्ण खेलकुद कार्यक्रमका रूपमा हेरिएको छ । प्रतियोगितामार्फत नयाँ प्रतिभा पहिचान हुनुका साथै युवामा खेल संस्कृतिको विकास हुने विश्वास लिइएको छ ।

डा. यादवले सम्पूर्ण टिमलाई शुभकामना दिँदै जोश, गर्व र खेल भावना कायम राखेर खेल्न आग्रह गरे ।