जनकपुरधाम, २५ कार्तिक । धनुषा जिल्लाको हंसपुर नगरपालिका–७ नौवाखोरमा सोमबार साँझ एक वृद्धा महिलाको निर्मम हत्या भएको छ ।

हत्या गरिएकी महिला ६२ वर्षीया चन्द्रकला देवी दास हुन् । उनको शव घरदेखि करिब ५०० मिटर टाढा खेतमा फेला परेको हो ।

जिल्ला प्रहरी कार्यालय धनुषाका प्रवक्ता गणेश बहादुर बमका अनुसार चन्द्रकलाको टाउको र अनुहारमा धारिलो हतियार प्रहार गरी हत्या गरिएको देखिएको छ । ‘शवको अवस्था अत्यन्तै वीभत्स छ । अनुहार चिन्न नसक्ने गरी प्रहार गरिएको छ,’ उनले भने ।

प्रहरीका अनुसार घटनाबारे सोमबार राति करिब ९ बजेतिर सूचना प्राप्त भएपछि टोली घटनास्थल पुगेको थियो । अनुसन्धानको क्रममा प्रहरीले एकजनालाई पक्राउ गरी सोधपुछ भइरहेको जनाएको छ । पक्राउ परेकाको परिचय भने अनुसन्धानको गोपनीयताका कारण खुलाइएको छैन ।

प्रारम्भिक अनुसन्धानका आधारमा यो घटना व्यक्तिगत विवाद वा मिटरव्याज सम्बन्धी झगडासँग सम्बन्धित हुन सक्ने प्रहरीको आशंका छ । स्थानीयवासीका अनुसार चन्द्रकला देवीले केही वर्षयता मिटरव्याजमा रकम लगानी गर्दै आएकी थिइन् । पछिल्लो समय उनीसहित गाउँका अन्य मिटरव्याज पीडितहरूले धम्की र दबाब खेप्दै आएका थिए ।

घटनास्थलबाट प्रहरीले सुनचाँदीका केही गरगहना बरामद गरेको छ । प्रारम्भिक रूपमा मृतकका शरीरमा रहेका गरगहना लुटिएको पाइएको र सोही गहना पछि बरामद भएको प्रहरीले जनाएको छ ।

प्रहरीले घटनाको पूर्ण विवरण पत्ता लगाउन जिल्ला अपराध अनुसन्धान शाखा र केन्द्रीय टोली समेत परिचालन गरेको छ । शव पोस्टमार्टमका लागि जनकपुरधाम प्रादेशिक अस्पतालमा पठाइएको छ ।