जनकपुरधाम, ८ असोज । जनकपुरधाम नजिकैको धनौजी गाउँपालिकाकी १६ वर्षीय बालिकालाई गत असार १७ गते अपहरण गरी जबरजस्ती करणी गरिएको घटना सार्वजनिक भएपछि अदालतले कारबाहीको आदेश जारी गरेको छ । अदालतले घटनामा संलग्न चारजनालाई पुर्पक्षका लागि कारागार पठाउने निर्णय गरेको हो ।

जिल्ला अदालत धनुषाका न्यायाधीश इश्वर आचार्यको इजलासले जिल्ला प्रहरी कार्यालय धनुषाका दुई प्रहरी जवान बरुणकुमार साह र नितेशकुमार महतोका साथै होटेल मधेश प्रदेशका कामदार धीरजकुमार दासलाई पुर्पक्षका लागि थुनामा पठाउने आदेश जारी गरेको छ । यद्यपि, होटेल संचालक मोलवी अजिज राइनलाई ४ लाख रुपैयाँ धरौटीमा छाड्ने आदेश दिइएको छ ।

घटना कसरी भयो?
जाहेरीअनुसार, २९ चैत २०८१ मा बालिकाको आमा खेतमा गएको बेला घर नजिकै पसल चलाउने ताहिर राइनले बालिकालाई विवाहको प्रलोभन देखाएर अपहरण गरेका थिए । बालिकालाई जनकपुर ल्याएर आफूसहित अरू व्यक्तिहरूलाई संलग्न गराई जबरजस्ती करणी र होटलमा बन्धक बनाइएको जाहेरीमा उल्लेख छ ।

असार १७ गते बिहान ४ बजे बालिकालाई सीएफसी होटलमा ल्याइएको र त्यहाँ दुई दिन बन्धक बनाई अपहरणमा संलग्नहरूले जबरजस्ती करणी गरेको जानकारी जाहेरीमा छ । त्यसपछि पीडितलाई मुरलीचोकस्थित होटेल मधेश प्रदेश गेस्ट हाउसमा लगिएको थियो । त्यहाँ पनि प्रहरी पोशाकमा रहेका बरुण, नितेश र राजले बालिकालाई धम्की र जबरजस्ती करणी गरेको उल्लेख छ ।

पीडित बालिकाले जाहेरीमा भनेकी छन्, ‘मलाई जाहेरी फिर्ता लिऊ भनी धम्की दिएर कुटपिट गरे । दुई रात त्यही होटलमा राखियो र होटलका साहुजी तथा ग्राहकहरूले जबरजस्ती करणी गरे ।’

महिला अधिकारकर्मीहरूका अनुसार पहिलेको अपहरणमा ताहिर राइनले दिएको जाहेरी प्रहरीले दर्ता गर्न अस्वीकार गरेको थियो । पछिल्लो घटनामा प्रहरीकै संलग्नता देखिएपछि मात्र जिल्ला प्रहरी कार्यालयले कानूनी प्रक्रिया अगाडि बढाएको थियो । सरकारी वकिलको कार्यालय र मानव अधिकार आयोगको दबाबपछि मात्र दोस्रो जाहेरी दर्ता भएको थियो ।

सर्वेक्षण अनुसार पीडित बालिकासँगै अभियुक्तहरूले उनलाई होटलमा बन्धक बनाई जबरजस्ती करणी गरि दुई दिनसम्म विभिन्न व्यक्तिहरूलाई बलपूर्वक सामेल गराएर यौन शोषण गरेको समेत प्रमाणित छ ।

अदालतले प्रतिवादीहरूसँग पटकपटक फोन सम्पर्क भएको कल डिटेल र पीडितको स्वास्थ्य परीक्षण प्रतिवेदनको आधारमा तीनैजनालाई पुर्पक्षका लागि कारागार पठाउने निर्णय गरिएको आफ्नो आदेशपत्रमा उल्लेख गरेको छ ।

मुख्य अभियुक्त अजिज राइनलाई होटेल सञ्चालन सम्झौताको प्रतिलिपी पेश गरेको आधारमा धरौटीमा छोडिएको छ । अदालतले उनलाई २ असोजमा चार लाख रुपैयाँ धरौटी बुझाएर छोड्न आदेश दिएको छ ।

पीडित बालिका अहिले शान्ति पुनःस्थापना केन्द्रमा सुरक्षित छन् । महिला अधिकारकर्मीहरूले बालिकाका आमा र मामासँग मिलाएर मुद्दा मिलाउने प्रयास गरिएको आरोप लगाएका छन् । तर, बालिकाले आफ्ना दोषीहरूलाई कानूनी दायरामा ल्याउन आग्रह गर्दै न्यायको लागि निरन्तर संघर्ष गरिरहेकी छन् ।

सरकारी वकिल कार्यालय धनुषाका प्रमुख अधिवक्ता विदुर कार्कीका अनुसार प्रहरीले शुरुवाती जाहेरीको बेवास्ता गर्दा दोस्रो जघन्य घटना भएको हो । ‘पहिलेकै जाहेरीमा प्रहरीले समयमै अनुसन्धान नगरेपछि दोस्रो घटना भएको हो,’ उनले भने ।

धनुषाका प्रहरी उपरीक्षक रेग्मीका अनुसार दुईवटै मुद्दा दर्ता भएको छ । पहिलेका प्रतिवादी फरार छन् । विदेश गए भन्ने समाचार प्राप्त भएको छ । इन्टरपोल मार्फत ल्याउने प्रयास हुनेछ ।