सिरहा, २ भदौ । रौतहटको ऐतिहासिक गौर हत्याकाण्डमा जनता समाजवादी पार्टी (जसपा) नेपालका अध्यक्ष उपेन्द्र यादवविरुद्ध अनुसन्धान गर्न सर्वोच्च अदालतले दिएको आदेशप्रति पार्टीका कार्यकर्ताहरू आक्रोशित बनेका छन् ।

सोमबार सिरहाको लहानस्थित शहीद चौकमा प्रदेश सभा सदस्य ललिता दासको नेतृत्वमा गरिएको विरोध प्रदर्शनमा जसपाका स्थानीय नेता तथा कार्यकर्ताहरू ठूलो संख्यामा सहभागी भए । प्रदर्शनका क्रममा ‘उपेन्द्र यादवमाथि राजनीतिक षड्यन्त्र बन्द गर’, ‘लोकतन्त्रविरोधी आदेश खारेज गर’ जस्ता नाराहरू गुञ्जिएका थिए ।

प्रदर्शनमा सहभागी नेताहरूले सर्वोच्च अदालतको आदेशलाई राजनीतिक पूर्वाग्रहपूर्ण तथा लोकतान्त्रिक मूल्य–मान्यताविरुद्धको कदम भन्दै आलोचना गरे । उनीहरूले यादवलाई फसाउन खोजिएको आरोप लगाउँदै अनुसन्धान प्रक्रिया तत्काल खारेज गर्न माग गरे ।

२०६३ साल चैत्र ७ गते गौरस्थित राईसमिलको चौरमा भएको झडपमा माओवादीका २७ जना कार्यकर्ता मारिएका थिए भने सयभन्दा बढी घाइते भएका थिए । सो घटनाका प्रमुख अभियुक्तका रूपमा तत्कालीन उपप्रधानमन्त्री समेत रहेका जसपा अध्यक्ष यादवको नाम पुनः अनुसन्धान सूचीमा राखिएको छ । यस घटनामा लामो समयसम्म मुद्दा बाँकी रहे पनि पछिल्लो आदेशसँगै यादव पुनः विवादमा तानिएका हुन् ।

जसपाका कार्यकर्ता तथा नेतृत्वले यो आदेशलाई राजनीतिक प्रतिशोधको परिणाम भनेका छन् । पार्टीले सर्वोच्चको आदेशलाई खारेज गर्न माग गर्दै न्यायालयबाट न्याय नभई पूर्वाग्रहपूर्ण निर्णय आएको आरोपसमेत लगाएको छ ।

विरोध प्रदर्शन शान्तिपूर्ण ढंगले सम्पन्न भए पनि कार्यकर्ताहरूले आन्दोलनलाई अझै तीव्र पार्ने चेतावनी दिएका छन् ।