जनकपुरधाम, १३ साउन । खडेरीका कारण धान रोपाइँमा गम्भीर असर पुगेका र पहिलेदेखि रोपिएका बाली पनि सुक्न थालेका मधेश प्रदेशका किसानहरूलाई राहत दिने उद्देश्यले भूमि व्यवस्था, कृषि तथा सहकारी मन्त्रालयले स्यालो ट्युबवेल जडान प्रक्रिया सुरु गरेको छ ।

कृषिमन्त्री जनार्दन सिंह क्षेत्रीको नेतृत्वमा प्रदेशका आठवटै जिल्लामा स्यालो ट्युबवेल जडानका लागि मन्त्रालयले निर्देशन जारी गरेको हो ।

मन्त्री क्षेत्रीले कृषि ज्ञान केन्द्रहरूलाई सूचना प्रकाशित गरेर किसानहरूलाई स्यालो ट्युबवेलका लागि आवेदन दिन आह्वान गरेका छन् ।

पर्सा, बारा, रौतहट, र मधेश प्रदेशका अन्य जिल्लामा किसानहरूले आवेदन दिन थालिसकेका छन् । मन्त्रालयका अनुसार, किसानहरूबाट धमाधम आवेदन आइरहेका छन् । अबको १० दिनभित्र ट्युबवेल जडानको काम सुरु हुनेछ ।

यस योजना अन्तर्गत कुल १७ करोड ५५ लाख रुपैयाँको खर्च अनुमान गरिएको छ । चालु आर्थिक वर्षमा स्यालो ट्युबवेल जडानका लागि ६ करोड ५५ लाख रुपैयाँ र बाली प्रवद्र्धन शीर्षकबाट थप ११ करोड रुपैयाँ विनियोजन गरिएको छ । स्यालो ट्युबवेल जडानका माध्यमबाट यस वर्षको खडेरीबाट प्रभावित भएका किसानहरूलाई जल स्रोत उपलब्ध गराउने प्रयास भइरहेको छ ।

मन्त्री क्षेत्रीले भने, ‘प्रदेशका किसानहरूलाई राहत दिनका लागि यो योजना अघि बढाइएको हो । कृषिको मर्मत र प्रवद्र्धनमा जोड दिनेछौं ताकि भविष्यमा यस्ता समस्याहरूलाई झन राम्रोसँग समाधान गर्न सकिन्छ ।’

स्यालो ट्युबवेल जडानले खडेरीका कारण पानीको अभाव भोगिरहेका कृषकहरूलाई ठूलो राहत पुर्याउने छ । यस योजनाले कृषिमा उत्पादकत्व वृद्धि गर्ने र गाउँघरका किसानहरूको जीवनस्तर सुधार गर्ने उद्देश्य राखेको छ ।

यस योजनाबाट फाइदा उठाउने किसानहरूलाई जल स्रोतको सुनिश्चितता दिने र कृषि उत्पादनलाई प्रभावकारी बनाउने योजनामा सरकार पूर्ण रूपमा प्रतिबद्ध रहेको छ ।