सिरहा, १९ बैशाख । भारतको जम्मू काश्मीरको पहलगाम क्षेत्रमा भएको जघन्य चरमपन्थी हमलामा नेपाली युवा सुदीप न्यौपानेको मृत्यु भएको खबरपछि सिरहाको गोलबजारमा पाकिस्तानविरोधी विरोध प्रदर्शन भएको छ ।

नेपाली युवकको मृत्युले देशभर समवेदना र आक्रोशको लहर उत्पन्न गरेको छ । सिरहाको गोलबजारमा भएको प्रदर्शनमा सयौँ स्थानीयवासी सहभागी भएका थिए । प्रदर्शनकारीहरूले पाकिस्तानलाई चरमपन्थीहरूको संरक्षण गर्ने आरोप लगाउँदै नारा लगाए ।

प्रदर्शनमा कृष्ण गुरागाईं (हनी सिंह)को नेतृत्वमा धर्मराज हिन्दु सेनाले प्रमुख भूमिका निभाएका थिए । प्रदर्शनकारीहरूले पाकिस्तानविरोधी नारा लगाउँदै पाकिस्तानका सेना प्रमुख असीम मुनिरको पुतला जलाए । प्रदर्शनकारिहरूले ‘आतंकको आडमा मित्रता स्वीकार्य छैन’ भन्दै पाकिस्तानका क्रियाकलापहरूको विरोध गरे ।

‘हामी पाकिस्तानको आतंकवाद र चरमपन्थी गतिविधिहरूको विरोध गर्छौं । नेपाली युवाको हत्या हुनु र पाकिस्तानद्वारा चरमपन्थीलाई संरक्षण गर्ने कार्य असहनीय छ,’ प्रदर्शनको दौरान कृष्ण गुरागाईंले भने ।

सुदीप न्यौपानेसहित पहलगाम हमलामा २७ पर्यटकको ज्यान गएको थियो । यी पर्यटकहरू भारतको पहलगाम क्षेत्रमा घुम्न आएका थिए र उनीहरूको हत्या एक जघन्य आतंकवादी हमलाको परिणाम हो । यस हमलामा सुदीप न्यौपानेको मृत्युले नेपालमा गहिरो शोक र आक्रोशको लहर फैलाएको छ ।

गोलबजारमा आयोजित विरोध प्रदर्शनले क्षेत्रीय तनावलाई थप बढायो । प्रदर्शनमा सहभागी स्थानीयवासीहरूले पाकिस्तानविरोधी नारासहित ‘नेपाल–पाकिस्तान मित्रता पार्क’ निर्माण योजना खारेज गर्न माग गरे ।

गोलबजार नगरपालिकाका मेयर श्याम श्रेष्ठले प्रस्ताव गरेको ‘नेपाल–पाकिस्तान मित्रता पार्क’ निर्माण योजनाले स्थानीयमा विरोधको भित्तो निर्माण गरेको छ ।

स्थानीयवासीहरूले यस योजना राष्ट्रहितविपरीत भएको र यसलाई तत्काल खारेज गर्नुपर्ने माग गरे । एक स्थानीय नेता रत्नेश्वर यादवले भने, ‘पाकिस्तानसँग मित्रता गर्ने यस्ता योजना राष्ट्रको सम्मान र सुरक्षाको परिपक्षमा छैन । हामीले यसलाई स्वीकार्न सक्दैनौं ।’

नेपालका विभिन्न राजनीतिक दलहरूले पनि पहलगाम हमलामा सुदीप न्यौपानेको मृत्यु प्रति दुःख र आक्रोश व्यक्त गरेका छन् । नेकपा एमालेका नेताहरूले पाकिस्तानको चरमपन्थी गतिविधि र आतंकवादको स्पष्ट विरोध गर्दै सरकारसँग यसलाई रोक्नको लागि कडा कदम चाल्नुपर्ने धारणा राखेका छन् ।