काठमाडौं, २ वैशाख । लागुऔषध कारोबारमा संलग्न अन्तर्राष्ट्रिय सञ्जालको आशङ्कासहित त्रिभुवन अन्तर्राष्ट्रिय विमानस्थलमा एक भारतीय नागरिक पक्राउ परेका छन् । थाईल्यान्ड हुँदै नेपाल प्रवेश गरेका ती व्यक्तिको झोलाबाट झन्डै सात किलो गाँजा बरामद भएपछि सुरक्षा संयन्त्र थप सतर्क बनेको छ ।

पक्राउ पर्ने व्यक्ति २७ वर्षीय भिसाक भिजयन हुन् । उनी बैंककबाट थाई एयरको नियमित उडानमार्फत गएराति काठमाडौं प्रवेश गरेका थिए । विमानस्थल सुरक्षा प्रमुख तथा प्रहरी वरिष्ठ उपरीक्षक सोमेन्द्रसिंह राठौँरका अनुसार भिजयनको लगेज चेकजाँचका क्रममा गाँजा भेटिएको हो ।

‘६ किलो ९७० ग्राम गाँजा विशेष किसिमको प्याकेटमा हालिएको थियो । सुरुमा सामान्य जाँचमा फस्न सक्ने खालको व्यवस्था गरिएको देखिन्छ,’ राठौँरले बताए ।

प्रहरीको प्रारम्भिक अनुमान अनुसार भिजयन कुनै ठूला सञ्जालको सदस्य हुन सक्ने सम्भावना रहेको छ । बैंकक हुँदै नेपाल आउने यात्रुलाई सामान्यतया पर्यटक वा ट्रान्जिट यात्रु मानिने गरिएकोमा लागुऔषध ओसारपसारका लागि प्रयोग गरिएको हुनसक्ने देखिएको छ ।

नेपाल प्रहरीको लागुऔषध नियन्त्रण ब्यूरोका अनुसार पछिल्लो समय भारत, थाईल्यान्ड, म्यानमार हुँदै नेपाल भित्रिने तथा नेपालबाट तेस्रो मुलुकतर्फ लागुऔषध ओसारपसार हुने क्रम बढ्दै गएको छ ।

पक्राउ परेका भिजयनलाई हाल लागूऔषध नियन्त्रण ब्यूरो कोटेश्वरमा राखेर थप अनुसन्धान थालिएको छ । प्रहरी स्रोतका अनुसार उनलाई ओसारपसारमा प्रयोग गरिएको अन्य व्यक्तिहरू, विमानस्थलभित्र सम्भावित मिलेमतो र अन्तर्राष्ट्रिय नेटवर्कका बारेमा सोधपुछ भइरहेको छ ।