जनकपुरधाम, २६ चैत । आम जनता पार्टी (आजपा) का केन्द्रीय वरिष्ठ उपाध्यक्ष उपेन्द्र साहले पार्टीको नेतृत्वसँग असन्तुष्टि जनाउँदै आफ्नो जिम्मेवारीबाट मुक्त भएको घोषणा गरेका छन् ।

पार्टीको उपमहासचिव पदबाट राजीनामा दिएका साहले अब कुनै पनि संगठनात्मक जिम्मेवारीमा नरहने बताएका छन् । उनले आफ्नो फेसबुक पेजमा सो कुरा सार्वजनिक गर्दै पार्टी अध्यक्ष प्रभु साहसँगको लामो सहकार्यको लागि धन्यवाद व्यक्त गरे ।

उपेन्द्रले आफ्नो राजनीतिक यात्रा राष्ट्रिय जनमोर्चा पार्टीबाट सुरु गरेका थिए । माओवादीका पोलिटब्युरो सदस्यको जिम्मेवारी पनि पुरा गरिसकेका छन् । उनले फेसबुकमार्फत आफ्ना समर्थक र सार्वजनिक रूपमा यो महत्वपूर्ण निर्णयका बारेमा जानकारी गराएका थिए ।

रौतहटको माधव नारायण नगरपालिका–५ का निवासी उपेन्द्र साहले २०७९ सालको निर्वाचन अघि नेकपा एमालेको केन्द्रीय सदस्य, पार्टी जिल्ला इन्चार्ज र तेस्रो स्थानमा समानुपातिक सांसदको लागि सिफारिस प्राप्त गरेका थिए । चुनावी समयमा उनले प्रतिनिधि सभा सदस्यको चुनावमा स्वतन्त्र उम्मेदवारी दिई निर्वाचित भएका थिए ।

नयाँ गठबन्धनको तयारीको संकेत दिँदै उपेन्द्रले भने, ‘भर्खरै पार्टी छोडेको छु । अहिले केही समय विश्राम गर्छु । साथी सहयोगीहरूको सल्लाह र सुझाव अनुसार कुनै नयाँ दलमा आबद्ध हुने तयारी गर्दैछु ।’ यस बीचमा उनले पार्टीसँगको आफ्नो सम्बन्धलाई एक नयाँ दृष्टिकोणबाट अघि बढाउने विचारमा रहेका छन् ।

पार्टीका उपमहासचिव कुन्दन कुशवाह पनि असन्तुष्टि जनाउँदै नेकपा एमालेमा प्रवेश गरिसकेका छन् । कुशवाह हाल एमालेका केन्द्रीय सदस्यका रूपमा कार्यरत छन् ।