बारा, २३ चैत । बारा प्रहरीले विशेष सूचनाका आधारमा सञ्चालन गरेको अपरेशनमा ११.६८ किलो चरेससहित एक जनालाई पक्राउ गर्न सफल भएको छ । पक्राउ परेका व्यक्ति मकवानपुर जिल्लाको थाहा नगरपालिका–६ निवासी ३८ वर्षीय दशरथ थिङ रहेका छन् ।

थिङलाई बारा जिल्लाको जीतपुर सिमरा उपमहानगरपालिका–२१ स्थित क्षेत्रबाट चरेससहित नियन्त्रणमा लिइएको हो । इलाका प्रहरी कार्यालय अमलेखगञ्जबाट प्रहरी नायब निरीक्षक टेकबहादुर कार्कीको नेतृत्वमा खटिएको प्रहरी टोलीले शनिबार बिहान विशेष सुराकीका आधारमा चेकजाँचका क्रममा उनलाई समातेको हो ।

पक्राउ परेका थिङ हेटौंडाबाट वीरगन्जतर्फ जाँदै गरेको बा ४८ प ९३३ नम्बरको १५० सिसी क्षमताको पल्सर मोटरसाइकलमा सवार थिए । चेकजाँचको क्रममा मोटरसाइकलको सिटमुनी लुकाएर राखिएको अवस्थामा चरेस फेला परेको प्रहरीले जनाएको छ ।

प्लास्टिकमा प्याक गरेर राखिएको ती चरेसको तौल ११.६८ किलोग्राम रहेको छ । लागुऔषध नियन्त्रण सम्बन्धी कानून अनुसार यस परिमाणको चरेस अवैध रूपमा ओसारपसार गर्नु गम्भीर आपराधिक गतिविधिमा पर्न आउँछ ।

पक्राउ परेका थिङमाथि आवश्यक अनुसन्धान थालिएको तथा लागुऔषध नियन्त्रणसम्बन्धी मुद्दामा प्रक्रिया अगाडि बढाइएको प्रहरीले जानकारी दिएको छ ।