जनकपुरधाम, माघ २० । रौतहट जिल्ला अदालतका न्यायाधीशहरूलाई ‘झोले’ भनेपछि आमजनता पार्टी (आजपा) का अध्यक्ष प्रभु साहविरुद्ध अदालतमा अवहेलना मुद्दा दायर भएको छ ।

रौतहट क्षेत्र नम्बर ३ बाट निर्वाचित प्रतिनिधिसभा सदस्य साहले सामाजिक सञ्जाल फेसबुकमा तीन साताअघि न्यायाधीशहरूलाई लक्षित गर्दै ‘रौतहट जिल्ला अदालतका झोले न्यायाधीशहरू’ भनेर टिप्पणी गरेका थिए । यसका कारण यो विवाद सुरु भएको हो ।

अध्यक्ष साहविरुद्ध गत शुक्रबार बौधिमाई नगरपालिकाका मेयर प्रदीपकुमार यादवले जिल्ला अदालतमा अवहेलना मुद्दा दर्ता गरेका हुन् । साहले २९ पुसमा न्यायाधीशहरूविरुद्ध आक्रोशपूर्ण अभिव्यक्ति दिँदै, ‘नेताहरूको झोले न्यायाधीशहरूले रौतहट बदनाम र अस्तव्यस्त भयो,’ भनेर लेखेका थिए । उनले बेइमान र अयोग्य न्यायाधीशहरूको छानबिन गर्न आग्रह गर्दै सम्बोधनमा मुख्य न्यायाधीशको ध्यानाकर्षण गराएका थिए ।

यो विवादको निरन्तरता स्वरूप साहविरुद्ध दायर मुद्दामा आइतबार जिल्ला अदालतका न्यायाधीश शम्भुप्रसाद रेग्मीको इजलासमा सुनुवाइ भइरहेको छ । मेयर यादवको आरोप अनुसार साहले अदालतको गरिमा खलल पुर्याएका छन् । अदालतको सम्मानलाई ठेस पुर्याउने खालका टिप्पणी गरिएको भन्दै न्यायालयको सम्मान बचाउन मुद्दा दर्ता गरिएको हो ।

त्यसैगरी, साहको नेतृत्वमा आजपा महासचिव त्रिभुवन साह पनि यो मुद्दामा संलग्न छन् । महासचिव साहविरुद्ध भने अदालत परिसरमा ज्यान मार्ने धम्की दिएको आरोपसमेत लागेको छ । नगर प्रमुख यादवले आरोप लगाएअनुसार अदालतको आदेश लागू गर्न खोज्दा त्रिभुवन साहले उनलाई धम्की दिएका थिए ।

अदालत परिसरमा भएको विवादलाई लिएर गंगाराम बैठालाई पुर्पक्षका लागि थुनामा पठाउने आदेश यसअघि नै भइसकेको छ । बैठाले नगर प्रमुख यादवमाथि आक्रमण तथा अभद्र व्यवहार गरेका थिए ।

यो मुद्दाको सुनुवाइ सकिएपछि न्यायाधीश रेग्मीले आइतबार नै आफ्नो आदेश दिने सम्भावना रहेको छ ।