सिरहा, १९ चैत । सिरहामा एकै परिवारका सदस्यले सामुहिक कुटपिट गर्दा एक युवकको मृत्यु भएको छ ।

मृत्यु हुनेमा लहान नगरपालिका वडा नम्बर–८ बस्ने २१ वर्षीय हरिभजन मण्डल रहेका छन् ।

शनिबार साँझ लहानस्थित एकै परिवारका ४÷५ जना सदस्यहरुले कुटपिट गर्दा मण्डलको मृत्यु भएको प्रहरीले जनाएको छ ।

लहान नगरपालिका–७ स्थित प्रिया जेनरल स्टोरमा कार्यरत मण्डल शनिबार बेलुकी पसल बन्द गरेर गणेश चोक हुँदै आफ्नो घरतर्फ गइरहेको बेलामा लहान–८ बस्ने राजलाल साहले मण्डललाई पछाडीबाट धक्का दिएका थिए ।

धक्कामुकीलाई लिएर मण्डलसँग साहको सामान्य विवाद भएको थियो । विवाद साम्य भएपछि मण्डल आफ्नो घरतर्फ गइरहँदा आवेशमा आएका साहले उनलाई पछ्याउँदै गएका थिए ।

केहीबेरमा साहले आफ्ना छोरा शिव साह, भोला साह, नाति भिम साहलाई बोलाएर चारैजना मिलेर मण्डललाई कुटपिट गर्न थालेका थिए । कुटपिटबाट गम्भीर घाइते भएका मण्डललाई स्थानीयले घरसम्म पुर्याउँदा उनले २÷३ पटक बान्ता गरेको बताइएको छ ।

मण्डलका बुवा रामकुमार मण्डलले घाइते छोरालाई उपचारका लागि कामना नर्सिङ्ग होममा लगे । त्यहाँ उनको अवस्था चिन्ताजनक भएको भन्दै चिकित्सकले विराटनगर वा धरान लगन सल्लाह दिएका थिए । विराटनगरस्थित विराट नर्सिङ्गहोममा पुर्याउँदा उनको मृत्यु भइसकेको थियो ।

घटनामा संलग्न रहेको भन्दै राजलाल साह र भिम साहलाई प्रहरीले पक्राउ गरिसकेको छ भने अन्य फरारहरुको खोजी भइरहेको प्रहरीले जनाएको छ ।