महोत्तरी, २२ कार्तिक । महोत्तरी निर्वाचन क्षेत्र नं.२ मा सत्तारूढ गठबन्धनको तर्फबाट प्रतिनिधिसभा सदस्य पदका उम्मेदवार शरत सिंह भण्डारीले मंगलबार जिल्लाको भङ्गहा नगरपालिकास्थित कबिलासा, बखरी, सिंग्याहीलगायतका ठाउँहरूमा घरदैलो कार्यक्रम सम्पन्न गरेका छन् ।घरदैलोको क्रममा लोसपाका शीर्ष नेतासमेत रहेका प्रतिनिधिसभा सदस्यका उम्मेदवार भण्डारीले राजनीतिक स्थिरता, संविधानको रक्षा र समृद्धिका लागि शान्ति ल्याउन र संविधान बनाउन सहकार्य गरेका राजनीतिक शक्तिहरू यस निर्वाचनमा एकजुट भएर गठबन्धन निर्माण गरेको बताएका हुन् ।उनले बहुमतको संसद विघटन गरेर जनमतको अपमान गर्ने तथा राजनीतिक अस्थिरता सिर्जना गर्ने केपी ओली प्रवृतिका विरुद्ध बनेको गठबन्धनका उम्मेदवारलाई चुनावमा जिताउन मतदातासँग आग्रहसमेत गरे ।

उनले शान्ति र संविधानलाई कार्यान्वयन गर्दै देशलाई विकास र समृद्धिको बाटोमा अघि बढाउन भ्रष्ट्राचारीको संरक्षक ओलीका विरुद्ध गठबन्धन बनेको जिकिर गरे ।भण्डारीले यसपालीको निर्वाचनमा महोत्तरीमा मात्र नभई देशैभरी सत्तारूढ गठबन्धनले जित्ने दावीसमेत गरे ।

घरदैलोमा भण्डारीसँगै महोत्तरी-२ (क) बाट प्रदेशसभा सदस्य पदका उम्मेदवार जयनुल राईनको पनि उपस्थिति रहेकोे थियो ।

भण्डारीको घरदैलोमा जनताकोसमेत व्यापक सहभागिता देखिन्छ ।