सिरहा, १४ असार । सिरहामा बोक्सी आरोपमा एक महिलालाई मलमूत्र खुवाइएको घटना बाहिरिएको छ ।

जिल्लाको भगवानपुर गाउँपालिका–४ ठाडी टोलकी ६० बर्षीया आतिका देवी कामैतलाई बोक्सीको आरोपमा मलमूत्र खुवाएर अमानवीय व्यवहार गरिएको हो ।

कामैतलाई मलमूत्र खुवाइएको आरोपमा प्रहरीले दुईजना महिलालाई पक्राउ गरेको छ ।

पक्राउ पर्नेमा सोही ठाउँ बस्ने ३० बर्षीया फुलोदेवी साह र ५५ बर्षीया कोशिला देवी साह छन् ।

दुबैजनाले कामैतलाई बोक्सीको आरोपमा मलमूत्र खुवाएर अमानवीय व्यवहार गरेको आरोप छ ।

असार ११ गते दिउँसो साढे १२ बजेतिर कामैतलाई दुबैजनाले मलमूत्र खुवाएको जिल्ला प्रहरी कार्यालय सिरहाका प्रवक्ता प्रहरी नायव उपरीक्षक सुवास बुढाथोकीले जानकारी दिए ।

दुबैजनालाई इलाका प्रहरी कार्यालय लहानको टोलीले नियन्त्रणमा लिई बोक्सी आरोप कसूरमा मुद्दा दर्ता गरी अन्य अनुसन्धान गरिरहेको डीएसपी बुढाथोकीले बताए ।