काठमाडौं, १६ बैशाख । आसन्न स्थानीय तहको निर्वाचनका लागि उम्मेदवारी मनोनयन दर्ता गरेकामध्ये करिब चार हजारले उम्मेदवारी फिर्ता लिएका छन् ।

वैशाख ११ र १२ गते मनोनयन दर्ता सम्पन्न भएकोमा शुक्रबार साँझ ५ बजेसम्म फिर्ता लिन समय दिइएको थियो ।

निर्वाचन आयोगका प्रवक्ता एवं सहसचिव शालिग्राम शर्मा पौडेलले प्रणाली यकिन रूपमा प्रविष्ट भइनसके पनि करिब चार हजारले उम्मेदवारी फिर्ता लिएको जानकारी प्राप्त भएको बताए ।

सो प्रणालीमा आज ७ बजेसम्मको विवरणअनुसार १ लाख ५३ हजार २२० उम्मेदवार प्रणालीमा प्रविष्ट भएका छन् ।