सिरहा, १८ चैत । सिरहामा तीनवटा पसलमा आगलागी हुँदा एक करोड बराबरको धनमाल जलेर नष्ट भएको छ ।

जिल्लाको धनगढीमाई नगरपालिका–१० धनगढीबजारमा रहेको गुञ्जेश्वर साहको कस्मेटिक पसल, विलेक्षण साहको जनरल स्टोर र अशेश्वर साहको आइरण स्टोरमा आगलागी भएको हो ।

बिहीबार राति उनीहरुको पसलमा आगलागी हुँदा करिब १ करोड मूल्य बरावरको धनमाल जलेर नष्ट भएको प्रहरीले जनाएको छ ।

आगलागीका कारण गुञ्जेश्वर साहको पसलमा रहेको सम्पूर्ण सामान, २ लाख ५० हजार नगद र २ तोलाभन्दा बढि सुनसमेत आगोमा परेको जनाइएको छ ।

त्यस्तै, विलेक्षण साहको पसलमा रहेको ५० हजार नगद र धेरै सामान जलेर नष्ट भएको छ ।

विद्युत सर्ट भएर आगलागी भएको जिल्ला प्रहरी कार्यालय सिरहाका सूचना अधिकारी सुभाष बुढाथोकीले जानकारी दिए ।

आगो स्थानीय, प्रहरी र गोलबजार, लहान र मिर्चैया नगरपालिकाबाट आएको दमकलले नियन्त्रण लिएको थियो ।