जनकपुरधाम, १९ फागुन । धार्मिक नगरी जनकपुरधामबाट पर्यटकीय नगरी पोखरासम्मको हवाइ उडान फागुन २१ गते शनिबारदेखि सुरु हुने भएको छ ।

नागरिक उड्डयन कार्यालय जनकपुरधामले १७ फागुनमा महाशिवरात्रिदेखि जनकपुरधामबाट पोखरासम्मको सीधा हवाइ उडान हुने भनिएपनि केही प्राविधिक कारणले हुन नसकेको जनाएको छ ।

जनकपुरधाम विमानस्थलका प्रवन्धक योगेन्द्रनाथ कुँवरले जनकपुरधामबाट पोखराका लागि हुने उडानको अग्रिम टिकट बुकिङ गत बुधबारदेखि नै सुरु गरिएपनि नियमित उडान भने फागुन २१ ग्ते शनिबारदेखि हुने जानकारी दिए ।

सुरुमा हप्तामा तीन दिन र त्यसपछि यात्रुको मागअनुसार दैनिक उडान भर्ने योजना रहेको उनले बताए । अहिले प्रत्येक हप्ताको सोमबार, बिहीबार र शनिबार जनकपुरधामबाट पोखराका लागि उडान हुने उनले बताए ।

जनकपुरधाम आउने पर्यटक अब जहाजमार्फत पोखरा तथा पोखरा आउने पर्यटकले धार्मिक नगरी जनकपुरधाम भ्रमण गर्नका लागि केही मिनटको हवाइ यात्रा तय गरेर आउने जाने भएका छन् । यसले गर्दा दुवै ठाउँको पर्यटन प्रवद्र्धनमा थप टेवा पुग्ने विश्वास लिइएको छ ।

केही महिनाअघि मधेस प्रदेशका मुख्यमन्त्री लालबाबु राउतले गण्डकी प्रदेशका मुख्यमन्त्रीको निमन्त्रणमा पोखरा भ्रमण गएका बेलामा दुई पर्यटकीय सहरका बीचमा सीधा हवाइ उडान सेवा सुरु गर्ने लिखित सहमति गरेका थिए ।