कक्षा १२ को परीक्षाको नतिजा मंसिर २० गतेसम्म सार्वजनिक गरिने

काठमाडौं, ९ मंसिर । राष्ट्रिय परीक्षा बोर्डले कक्षा १२ को परीक्षाको नतिजा मंसिर २० गतेसम्म सार्वजनिक गर्ने तयारी गरेको छ ।
अहिले उत्तरपुस्तिका परीक्षणबाट प्राप्त नतिजालाई सम्परीक्षण तथा तालिकीकरणको काम भइरहेको बोर्डका परीक्षा नियन्त्रक कृष्ण शर्माले जानकारी दिए । कुनै प्राविधिक समस्या नआए मंसिर २० गतेभित्रै नतिजा सार्वजनिक गर्ने तयारी रहेको उनले बताए ।
यस वर्ष कक्षा १२ को परीक्षा गत भदौ ३० गतेदेखि असोज ८ गतेसम्म सञ्चालन गरिएको थियो । परीक्षामा पौने चार लाख विद्यार्थी सहभागी भएका थिए ।
गएको परीक्षामा कोभिड–१९ सङ्क्रमण भएर सहभागी हुन नपाएका देशभरीका कक्षा १२ का ४१ परीक्षार्थीका लागि बोर्डले मंसिर १६ गते अर्को परीक्षा सञ्चालन गर्ने भएको छ ।
छुटेका विद्यार्थीको लागि सम्बन्धित जिल्लाबाटै परीक्षा दिने व्यवस्था मिलाएको परीक्षा नियन्त्रक शर्माले बताए ।