जनकपुरधाम, ०८ असोज । मधेश प्रदेशमा सञ्चालनमा रहेका एफएम रेडियो तथा टेलिभिजनसँग सम्बन्धित फाइलहरू सूचना तथा प्रसारण विभागले आमसञ्चार प्राधिकरण मधेश प्रदेशलाई हस्तान्तरण गरेको छ ।

फाइल हस्तान्तरणसँगै अब रेडियो तथा टेलिभिजनको दर्ता, नवीकरणलगायतका कामका लागि काठमाडौं धाउनुपर्ने बाध्यता हट्ने भएको छ ।

काठमाडौंस्थित सूचना तथा प्रसारण विभागको कार्यालयमा विभागका महानिर्देशक अनुप दाहालले आमसञ्चार प्राधिकरण मधेश प्रदेशका अध्यक्ष जितेन्द्र खड्गालाई एफएम रेडियो तथा टेलिभिजनसँग सम्बन्धित फाइलहरू हस्तान्तरण गरेका हुन् ।

फाइलहरू जनकपुरधाम ल्याइएसँगै मधेश प्रदेशभित्र सञ्चालनमा रहेका सञ्चार संस्थाले दर्ता, नवीकरणलगायतका प्रशासनिक सेवा अब प्राधिकरणको जनकपुरधामस्थित कार्यालयबाटै लिन सक्ने भएका छन् ।

यसले सञ्चार संस्था सञ्चालकसँगै पत्रकार तथा सञ्चारकर्मीलाई समेत सेवा लिन काठमाडौं जानुपर्ने समय, खर्च र झन्झट घटाउने विश्वास गरिएको छ ।

आमसञ्चार प्राधिकरणका अध्यक्ष खड्गाले फाइल हस्तान्तरणलाई सामान्य प्रशासनिक प्रक्रिया मात्र नभई संविधानले दिएको प्रदेशको अधिकार कार्यान्वयनतर्फको महत्वपूर्ण उपलब्धि भएको बताए ।

उनका अनुसार नेपालको संविधान तथा मधेश प्रदेश सञ्चारसम्बन्धी कानुनले रेडियो तथा टेलिभिजनको दर्ता तथा नवीकरणलगायतका काम प्रदेशस्तरबाटै गर्ने व्यवस्था गरे पनि आवश्यक फाइल केन्द्रमै रहँदा उक्त अधिकार व्यवहारमा कार्यान्वयन हुन सकेको थिएन ।

करिब सात वर्षदेखि केन्द्रमा रहेका फाइलहरू मधेशमा ल्याउने प्रयास गर्दै आएको बताउँदै अध्यक्ष खड्गाले फाइल हस्तान्तरणमा मधेश प्रदेशका गृह, सञ्चार तथा कानुनमन्त्री फकिरा महतोको महत्वपूर्ण सहयोग रहेको उल्लेख गरे ।

‘जिम्मेवारी सम्हालेकै दिनदेखि फाइलहरू मधेश ल्याउने विषयमा निरन्तर प्रयासरत थिएँ,’ खड्गाले भने, ‘केही कानुनी जटिलता समाधान गर्न मधेश सरकारका गृह, सञ्चार तथा कानुनमन्त्री महतोको महत्वपूर्ण सहयोग रह्यो । उहाँ र तत्कालीन गृहसचिव गणेश नायकको सहयोगमा फाइलहरू प्राधिकरणमा ल्याउन सफल भएका छौँ ।’

फाइलहरू प्रदेशमै आएपछि अब सञ्चार संस्थाले सामान्य प्रशासनिक कामका लागि केन्द्र धाउनुपर्ने अवस्था अन्त्य हुने प्राधिकरणको भनाइ छ । यसबाट सञ्चार संस्थाको समय र आर्थिक भार घट्नुका साथै प्रदेशमै सेवा प्राप्त गर्ने वातावरण बन्ने विश्वास गरिएको छ ।

एफएम रेडियो तथा टेलिभिजन सञ्चालन, नवीकरण तथा अन्य प्रशासनिक प्रक्रियामा संलग्न सञ्चारकर्मी र सञ्चार संस्था सञ्चालकका लागि यो व्यवस्थाले सहजता ल्याउने बताइएको छ ।

सेवा लिन काठमाडौं जानुपर्ने बाध्यता हट्दा यातायात, बसोबास तथा अन्य खर्चसमेत घट्ने र नियमित कामका लागि जनकपुरधामबाटै प्रक्रिया अघि बढाउन सकिने भएको छ ।

फाइल प्रदेशमा आएसँगै सञ्चार संस्थासँग सम्बन्धित अभिलेख तथा प्रशासनिक काम प्रदेशस्तरमै व्यवस्थित हुने र सेवा प्रवाह छिटो तथा सहज हुने भएको छ ।

साथै दर्ता तथा नवीकरणबाट प्राप्त हुने राजस्वसमेत प्रदेश सरकारको आम्दानीमा जोडिने भएकाले यसबाट प्रदेशको राजस्व संकलनमा समेत वृद्धि हुने प्राधिकरणको विश्वास छ ।

अध्यक्ष खड्गाले फाइलहरू मधेशमा ल्याउनुलाई सञ्चार क्षेत्रको अधिकार प्रदेशमा स्थापित गर्ने प्रक्रियाको महत्वपूर्ण उपलब्धिका रूपमा लिएका छन् ।

उनका अनुसार अब प्रदेशमै उपलब्ध हुने सेवाका लागि सञ्चार संस्था तथा सञ्चारकर्मीले केन्द्रमा निर्भर हुनुपर्ने अवस्था क्रमशः अन्त्य हुँदै जानेछ ।

फाइल हस्तान्तरणसँगै मधेश प्रदेशमा सञ्चारसम्बन्धी सेवा विकेन्द्रीकरणको आधार तयार भएको प्राधिकरणको भनाइ छ ।

यसले प्रदेशको अधिकार कार्यान्वयनसँगै मधेशका सञ्चार संस्थालाई स्थानीयस्तरमै सेवा र सुविधा उपलब्ध गराउने बाटोसमेत खुलेको छ ।