काठमाडौं, २५ कार्तिक । राष्ट्रपति रामचन्द्र पौडेलले नवनियुक्त मधेश प्रदेशका प्रमुख सुरेन्द्र लाभ कर्णलाई पद तथा गोपनीयताको शपथ गराएका छन् ।

सोमबार मन्त्रिपरिषद्को सिफारिसमा कर्णलाई प्रदेश प्रमुखमा नियुक्त गर्दै राष्ट्रपति पौडेलले उनलाई पदभार ग्रहणका लागि शपथ गराएका हुन् ।

राष्ट्रपति कार्यालयका प्रवक्ता प्रदीप कुमार कोइरालाका अनुसार संविधानको धारा १६३ को उपधारा (२) बमोजिम कर्णलाई मधेश प्रदेश प्रमुखमा नियुक्त गरिएको हो ।

राष्ट्रपति भवन शीतल निवासमा आयोजित शपथ ग्रहण समारोहमा उपराष्ट्रपति रामसहाय प्रसाद यादव, प्रधानमन्त्री सुशीला कार्की, सभामुख देवराज घिमिरे, मन्त्रीहरू र उच्च पदस्थ अधिकारीहरूको उपस्थिति रहेको थियो ।

सरकारले यसअघि सोमबारकै मन्त्रिपरिषद् बैठकबाट तत्कालीन प्रदेश प्रमुख सुमित्रा सुवेदी भण्डारीलाई पदमुक्त गर्ने निर्णय गरेको थियो । भण्डारीले संविधानको मर्मविपरीत व्यवहार गर्दै महोत्तरीको बर्दिबासस्थित होटलमा नेकपा एमालेका नेता सरोजकुमार यादवलाई मुख्यमन्त्रीको शपथ गराएकी थिइन् ।

उनको उक्त कदमको विरोधमा मधेश प्रदेश राजधानी जनकपुरधाममा राजनीतिक तनाव सिर्जना भएको थियो । असन्तुष्ट दलहरूले सोमबार दिनभर प्रदर्शन गर्दै प्रदेश प्रमुखको कार्यशैलीको विरोध गरेका थिए । केही प्रदर्शनकारीहरूले मुख्यमन्त्री तथा मन्त्रिपरिषद्को कार्यालय परिसरमा तोडफोड समेत गरेका थिए ।

नवनियुक्त प्रदेश प्रमुख कर्णले शपथपछि संक्षिप्त टिप्पणी गर्दै भने, ‘संविधानको भावना अनुरूप निष्पक्षता र कानुनी मर्यादामा रही मधेश प्रदेशको राजनीतिक स्थायित्वमा योगदान पुर्याउने प्रतिबद्धता व्यक्त गर्छु ।’

कर्ण मधेशका वरिष्ठ शिक्षाविद् समेत मानिन्छन् । उनी लामो समयदेखि प्रदेशको सामाजिक र राजनीतिक क्षेत्रमा सक्रिय रहँदै आएका छन् ।