महोत्तरी, १५ कार्तिक । बिहीबार रातिदेखि परिरहेको अविरल वर्षाका कारण बिपी राजमार्गमा विभिन्न स्थानमा पहिरो खस्दा आवागमन ठप्प भएको छ । राजमार्ग अवरुद्ध भएपछि प्रवेश विन्दु बर्दिबास सुनसान बनेको छ ।

शुक्रबार बिहानदेखि राजमार्ग बन्द हुँदा केही सवारीसाधन हेटौँडाको वैकल्पिक बाटो प्रयोग गरेका छन् भने सयौँ सवारी र यात्रु बाटो खुल्ने प्रतीक्षामा छन् । वर्षा रोकिएको संकेत नदेखिएकाले तत्काल सडक सञ्चालनमा आउन कठिन देखिएको छ ।

जिल्ला ट्राफिक प्रहरी कार्यालयका अनुसार पहिरो र लेदोका कारण बिपी राजमार्गका धेरै खण्डमा आवतजावत अवरुद्ध छ । ट्राफिक निरीक्षक बाबुराम कार्कीका अनुसार काठमाडौँतर्फ जाने सवारीसाधनलाई बर्दिबासमै रोकिएको छ भने भिमान र सिन्धुलीसम्मका सवारी फाट्टफुट्ट सञ्चालनमा छन् ।

काभ्रेपलाञ्चोकलगायत पहाडी क्षेत्रमा निरन्तर पहिरो खसिरहेको र लेदो बग्ने क्रम जारी रहेकाले सुरक्षाका कारण केन्द्रको निर्देशनअनुसार सवारी आवागमन रोकिएको कार्कीले जानकारी दिए ।

बर्दिबास–३ गौरीडाँडास्थित तौलपुल ट्राफिक बिटका जवान जनक दाहालका अनुसार सामान्य दिनमा बिहान १० बजेसम्म १५०–२०० सवारी गुड्ने राजमार्गमा शुक्रबार बिहानसम्म एउटा पनि सवारी काठमाडौँतर्फ गएको थिएन । ‘उता पनि कुनै सवारी आएका छैनन्,’ उनले भने, ‘केही निजी सवारीलाई हेटौँडाको बाटो प्रयोग गर्न सुझाएका छौं ।’

यातायात व्यवसायी सीताराम ढुङ्गेलका अनुसार बर्दिबास हुँदै बिपी राजमार्गमा दैनिक करिब दुई हजार सवारीसाधन गुड्ने गर्छन् । तीमध्ये बर्दिबासबाट मात्रै १५० सार्वजनिक सवारी काठमाडौँतर्फ जान्छन् ।

ट्राफिक प्रहरीले वर्षा रोकिएलगत्तै पहिरो पन्छाउने र राजमार्ग सञ्चालनमा ल्याउने तयारी भइरहेको जनाएको छ भने यात्रु र सवारीधनीलाई धैर्य गर्न अनुरोध गरेको छ ।