रौतहट, ४ कार्तिक । रौतहटको मध्यभागमा अवस्थित गरुडा नगरपालिका–८ बिर्ता बजारमा रहेको शुभ लक्ष्मी महिमा वस्त्रालयमा गएराति भीषण आगलागी हुँदा ठूलो आर्थिक क्षति भएको छ । इलाका प्रहरी कार्यालय गरुडाका अनुसार आगलागी राति करिब ९ बजेर ५० मिनेट जाँदा भएको हो ।

पक्की संरचना भएको केदारनाथ साहको घरमा सञ्चालनमा रहेको बिगन साहको उक्त कपडा पसलमा अकस्मात् आगो लागेपछि आसपासका बासिन्दा त्रसित बनेका थिए ।

आगलागीको खबर पाएपछि प्रहरी चौकी बिर्ताका प्रहरी हवल्दार राजु साहको नेतृत्वमा पुगेको टोलीले स्थानीय बासिन्दाको सहयोगमा करिब साढे १० बजे आगो नियन्त्रणमा लिन सफल भएको इलाका प्रहरी कार्यालय गरुडाका प्रमुख प्रहरी नायब उपरीक्षक शंकर प्रसाद आचार्यले जानकारी दिए ।

प्रहरीका अनुसार आगलागीबाट पसलभित्र रहेका विभिन्न प्रकारका कपडा, काठका र्याक र अन्य सामग्री जलेर नष्ट भएका छन् । मानवीय क्षति नभए पनि करिब ३० देखि ४० लाख रुपैयाँ बराबरको सम्पत्ति नोक्सानी भएको प्रारम्भिक अनुमान गरिएको छ ।

स्थानीयहरूले भने विद्युत् सर्टसर्किटका कारण आगो लागेको हुन सक्ने बताएका छन् । राति अचानक धुँवा निस्किँदा स्थानीय बासिन्दाले तुरुन्तै प्रहरीलाई खबर गरेका थिए ।

घटनापछि प्रहरीले विस्तृत क्षति विवरण संकलन र आगलागीको वास्तविक कारण पत्ता लगाउने कार्य थालेको छ । डीएसपी आचार्यका अनुसार घटनास्थलमा निरीक्षण जारी छ । प्राथमिक रूपमा सर्टसर्किटकै कारण आगलागी भएको देखिएको भए पनि थप अनुसन्धानपछि मात्र स्पष्ट हुनेछ ।

स्थानीय व्यापारीहरूले यस्ता घटनाबाट हुने क्षति कम गर्न बजार क्षेत्रमा अग्नि–नियन्त्रण उपकरण अनिवार्य राख्न र विद्युत् लाइनको नियमित मर्मत गर्न सम्बन्धित निकायलाई आग्रह गरेका छन् ।