जनकपुरधाम, १४ असार । मधेश प्रदेशका मुख्यमन्त्री सतिश कुमार सिंहले जलवायु परिवर्तनका चुनौतीहरू समाधान गर्न वृक्षारोपणलाई ‘दायित्व’को रूपमा स्वीकार गर्नुपर्ने धारणा व्यक्त गरेका छन् ।

राष्ट्रिय वृक्षारोपण दिवसको अवसरमा शनिबार धनुषाको धनुषाधाम नगरपालिका–९ स्थित मुर्गियामा आयोजना गरिएको वृक्षारोपण कार्यक्रममा बोल्दै मुख्यमन्त्री सिंहले अब बिरुवा रोप्ने मात्र नभई हुर्काउने र संरक्षण गर्ने संस्कार पनि विकास गर्नुपर्नेमा जोड दिए ।

‘वृक्षारोपण अब उत्सव होइन, दायित्व हो,’ उनले भने, ‘जलवायु परिवर्तनले देशको समग्र क्षेत्र प्रभावित बनाएको छ । खेतीयोग्य जमिनमा असर, भूमिगत जलको ह्रास र तापक्रम वृद्धि गम्भीर चिन्ताका विषय हुन् । यस्ता चुनौतीको दीर्घकालीन समाधान वृक्षारोपण र वन संरक्षणमा नै छ ।’

कार्यक्रममा प्रदेशका वन तथा वातावरण मन्त्री सञ्जयकुमार यादवले जलवायु परिवर्तनलाई विश्वव्यापी चुनौती भन्दै यसका सामाजिक, आर्थिक र पर्यावरणीय असर नेपालमा समेत गहिरिँदै गएको बताए । उनले मधेशमा वन क्षेत्र घट्दै जाँदा बाढी, भू–क्षय र गर्मीका समस्या तीव्र बनेको उल्लेख गर्दै प्रदेशभर आठै जिल्लामा संरक्षणमुखी वृक्षारोपण अभियान सुरु गरिएको जानकारी गराए ।

‘मात्र सरकारी प्रयासले पुग्दैन,’ मन्त्री यादवले भने, ‘स्थानिय समुदाय, विद्यार्थी, युवा क्लब, नागरिक समाज र सञ्चार क्षेत्रको सहकार्य बिना लक्ष्य हासिल हुँदैन । सबैको सहभागिता आवश्यक छ ।’

कार्यक्रमका अवसरमा डिभिजन वन कार्यालय धनुषाका प्रमुख विनोदन सिंहले बुद्ध कबुलियत वन क्षेत्रमा बाँस, सिसौ, टिक, आँप, आमला लगायतका काठजन्य र फलफूल बिरुवाहरू रोपिने जानकारी दिए । उनका अनुसार १० हेक्टर क्षेत्रफलमा वृक्षारोपण गरिनेछ ।

कार्यक्रममा प्रदेश सरकारका पदाधिकारी, जनप्रतिनिधि, विद्यार्थी, स्वयंसेवक, सुरक्षाकर्मी तथा नागरिक समाजका प्रतिनिधिहरूको उल्लेखनीय सहभागिता रहेको थियो ।