सप्तरी, २ असार । शैक्षिक योग्यता नपुगी नक्कली प्रमाणपत्र पेश गरेर सव–इन्जिनियर पदमा नियुक्ति लिएका सप्तरीका दीपेन्द्रकुमार झाविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ ।

तिलाठी कोइलाडी गाउँपालिकामा करार सेवामा नियुक्त भएका झाले प्रमाणपत्र कीर्ते गरी सरकारी पद, सेवा सुविधा र आर्थिक लाभ प्राप्त गरेको अनुसन्धानबाट पुष्टि भएपछि आयोगले सोमबार काठमाडौंस्थित विशेष अदालतमा मुद्दा दायर गरेको हो ।

अख्तियारका सहायक प्रवक्ता देवीप्रसाद थपलियाका अनुसार झाले पेश गरेको शैक्षिक योग्यताको प्रमाणपत्र यथार्थ नभएको प्रमाणित भएपछि भ्रष्टाचार निवारण ऐनअनुसार कारबाही प्रक्रिया अगाडि बढाइएको हो ।

अख्तियारको अनुसन्धानले प्रमाणित गरेअनुसार उनले कीर्ते प्रमाणपत्रको भरमा नियुक्ति लिई आर्थिक सुविधा हडप्दै आएका थिए ।

अख्तियारका अनुसार यस प्रकारका कार्यले सरकारी प्रणालीमा विश्वास घटाउने भएकाले दोषीमाथि कडा कारबाही जरुरी भएको जनाइएको छ । आयोगले यस्ता प्रकरणमा शून्य सहनशीलताको नीति अवलम्बन गर्दै आएको बताउँदै भ्रष्टाचार विरुद्धको कदमलाई अझ सशक्त बनाइने प्रतिबद्धता जनाएको छ ।